Ramkhel buainak le COVID-19 pulrai ruangah Myannmar rammi acheu dengmang cu sifahnak chungah an tla kho, tiah United Nations Development Programme (UNDP) nih ralrin peknak bia a chim.

Hmai kum thok ka ahcun Myanmar rammi 25 million hrawng cu sifahnak chungah an tla kho, tiah UNDP nih April 30 ah cathanh a chuah.

“COVID-19 pulrai le atu lio ramkhel buainak nih kap hnih in an den hna caah sifak santlai lo pawl cu an sifak chinchin lai,” tiah UN Assistant Secretary-General le UNDP Regional Director for Asia and Pacific, Kanni Wignaraja nih Reuters media ah a chim.

“Liamcia kum 10 democracy chungah an ṭhanchomi hnih khat vialte cu thla tlawmpal chungah a tlau dih cang. Ralkap nih ram an uk i rammi acheu sifak dirhmun ah an um lio kum 2005 bantuk ah an kir kho,” ati.

Ni kum dongh ahkhan, Myanmar rammi 83% cu pulrai ruangah an tangka hmuhmi acheu a pit cang.

Mah lio cun, Myanmar rammi 11% hi sifak dirhmun ah an rak um.

Atu ramkhel buainak ruang ahhin, hmasa ah sifak tuk asi lomi 12% hrawng cu hmai kum thok ahcun sifak dirhmun ah an tla lai, ati.

“Kum 1 chungah Myanmar rammi acheu (25 million) dengmang cu sifak dirhmun ah an i chuah kho.

“Khuapi lebang cu an him lo chin lengmang i ralkap nih chawhvah le rian tlunkal a rengh caah sifak let 3 in an karh lai.

“Myanmar tangka kyat zong a man tla thluahmah cang i ramdang thil vialte an man tamtuk a kai lai. Bank zong ṭhaṭhi in rian an ṭuan khawh ti lo caah ramchung chuak thil man zong tamtuk a kai lai.

“Sifak dirhmun ah a tla ding minung an tamtuk hringhran caah ramdang vialte nih a rannak in zuanhnawh le bawmh an hau,” ati.