Russia President Vladimir Putin nih, “Ukraine ramri ah raltuk a cawngmi kan ralkap tlawmpal cu an hung kir cang,” tiah a thanh.
US President Joe Biden nih, “Russia ralkap ting 1 le cheu (150,000) nih Ukraine ram an kulh dih, Russia nih Ukraine a tuk khawh men rih ko,” tiah a chim.
President Biden nih, “Ukraine ramri um Russia ralkap tlawmpal an kir cang timi hi US nih kan fehter khawh rih lo caah hnangam awk a ṭha rih lo, Russia nih Ukraine a tuk khawh men rih ko,” ati.
Russia cu President Biden nih, “Ukraine tuk na timhmi hi i leet. Na tuk ahcun US le kan ṭanṭi Nitlaklei ram vialte nih Russia sipuaizi kan hrawh dih lai (Russia cu ram sifak ah kan canter lai),” tiin ralrin a pek.
“US nih dengteo in Russia tuk hi kan i timhmi si lo, nain Ukraine um US minung pawl a hnor sual hna lehlam ahcun fak chiahru in kan lehrulh lai.
“Russia nih Ukraine a tuk khawh men rih ko, nain a tuk lehlam ahcun fak taktak in kan lehrulh lai,” tiah a nolh.
