Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo caah Germany ram um Ramstein US Vanlawng Ralkap Sakhan ah kan kuat hmasa lai i cuka in US nih Ukraine ah a kuat lai, ati. Nain US nih amah kuat cu a ngamh ve lo caah an leet lawlaw — atang hi hmasa kan ṭialmi si.

Innpa ram a simi Poland nih Ukraine cu ral tuknak vanlawng 28 bak manlo/free in ka pek lai, tiin thawng a thanh cang.

Nain, Ukraine na bawmh tiin Russia nih a kan kah lai ti a phan caah Ukraine ah dairek kuat a ngamh lo. Germany ram um Ramstein US Vanlawng Ralkap Sakhan ah kan kuat lai, mah hnu ah US cozah nih Ukraine sinah a kuat te lai, ati.

Poland Ramdang Vuanci nih, “Kan ralkap vanlawng MIG-29 pawl cu a dihlak in atu bak manlo in kuat dingin redi kan si cang,” tiah thawng a thanh.

MIG-29 vanlawng cu Russia sermi asi i Poland nih 28 a ngeih. Mah vanlawng phun hi Ukraine ralkap nih an ngeih vemi le hman thiammi asi caah tinṭan pek hau loin an hman khawh colh ding asi.

Poland nih a ralkap vanlawng 28 bak Ukraine a pek ahcun a ralkap thazaang a der tuk ding si caah mah zaka ah “US cozah sinah hman ciami F-16 vanlawng pawl a rannak in kan cawk colh lai,” ati.

“MIG-29 vanlawng a ngei vemi NATO ram pawl zong nih nan vanlawng vialte cu kanmah bantukin Ukraine pe cio uh,” tiin Poland nih a fial chih rih hna.

NATO chungtel a si vemi Bulgaria ram zong nih MIG-29 vanlawng 15 a ngeih. NATO chungtel ṭhiam a simi Slovakia ram zong nih 12 a ngeih ve.

US a lungtling lo, an i ceih chap lio asi

Poland nih Germany ah kuat hmasa a timhmi cu US cozah a lungtling lo. Germany ram i Ramstein US Vanlawng Ralkap Sakhan ah kuat hmasa ahcun US le NATO ram vialte Russia nih a kan lehrulh khawh caah ṭihnung tuk ati.

A ngaingai ahcun, Poland hi US nih, “Na vanlawng MIG-29 pawl hi Ukraine sinah pe law na pek zat in US nih kan vanlawng F-16 kan in pek ve lai…,” tiin a fialmi si.

US nih cun Poland nih dairek in Ukraine ah kua seh ti a duh. Nain Poland nih a ngamh ve lo caah atu hi an i ceih liopi asi.

Poland Prime Minister Pu Mateusz Morawiecki nih, “Ukraine sinah ral tuknak vanlawng kuat cu NATO chungtel dihlak an lungtlin a hau.

“Mah ruangah Germany ram um Ramstein US Vanlawng Ralkap Sakhan ah kuat hmasa kan timhnak hi asi. Kanmah nawl in Ukraine ah kuat awk a ṭha lo,” ati.

Zeitin dah Ukraine sinah kan kuat lai timi an ceih lio asi caah zei tik dah Ukraine ralkap sin a phak lai timi cu chim khawh asi rih lo.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...