U.S. Vice President Mike Pence: Myanmar cozah nih Reuters thawngla thlah hna

U.S. Vice President Mike Pence: Myanmar cozah nih Reuters thawngla thlah hna

WASHINGTON (Reuters) – U.S. Vice President Mike Pence nih Myanmar cozah cu, Reuters thawngla thongthlak dingin bia na khiahmi hi let law law thlah hna, a ti.

Reuters media caah thawngla rian a ttuan Kawlrammi 2 hna cu Nikhatni ah Yangon Biaceihzung nih kum 7 veve thongthlak dingin bia a khiahpiak hna.

Wa Lone, kum 32 le Kyaw Soe Oo, kum 28 hna cu Rohingya khuami hna Myanmar ralkap nih an thahnak hna kong an hlat lio, ni kum December thla ah an rak tlaih hna.

Anmah nih cun, “kan palh lo, palek nih Yangon ah zaanriah ei a kan sawm i catlap an kan pek. Rawldawr in kan chuah cangka in ‘cozah thlithup catlap nan i ngeih’ tiin a kan tlaih colh, palek nih rap a kan fawih chommi si,” an ti.

U.S. Vice President nih, “Wa Lone le Kyaw Soe Oo hi thongthlak ding an si lo – minung tampi thahnawnnak le covo buarnak kong an phozar khawh caah thangtthat hna ding tu an si,” tiah Twitter ah a ttial.

“Wa Lone le Kyaw Soe Oo cu Rohingya mipi thahnawnnak kong pei an hlat ko cu, thawngla an si bang an rian pei an ttuan ko cu. An rian an ttuan ruang i Myanmar biaceihzung nih kum 7 veve thong a thlakmi hi cu ka siarem lo taktak,” tiah a ttial chih.

U.S. UN Palai Nikki Haley nih, “thawngla 2 kong hi US cozah nih biatak deuh in kan aupi cang lai,” tiah Nihnihni ah a chim.

“Thawngla 2 hna cu biatak an phuan ruangah thongthlak an tong,” a ti.

Mark Green, Ramkip Tthanchonak U.S. Zung lutlai zong nih, “hi bantuk tazacuai le thongthlak hi Myanmar ram democracy le upadi tthancho dawntu a si,” a ti ve.

Aa thok ning

Rakhine state um Rohingya hriamtlai (ARSA) nih August 2017 ah Myanmar palek le ralkap sakhan an tuk i minung 12 an thah hna caah Myanmar ralkap nih an lehrulh hna.

Nain, hriamtlai pawl lawng lehrulh hna loin Rohingya muslim a simi paoh an hrem dih hna, an tlaihhrem hna, an thah hna i inn an khanghpiak dih hna.

Cucaah, khuami Rohingya minung 700,000 leng an puan tom he Bangladesh ram ah an zaam. An tonmi vialte cu Bangladesh ram an phak hnu ah thawngla pawl sinah an phuan i ramdang media nih linsa tak in an ttial cio.

UN le ramdang cozah nih Myanmar cozah cu biatak tein an hro, an au hnawh.

December thla ah Reuters media caah thawngla a ttuan Kawlrammi Wa Lone le Kyaw Soe Oo nih Rohingya thahnawnnak kong cu Rakhine state i Inn Din khuate ah an va hlat.

Myanmar ralkap le palek nih Rohingya pa le ngakchia 10 an thah hna nak kong an phozar.

Myanmar ralkap nih Rohingya cungah an tuahmi dang zong an hlat cuahmah. Mah lio, December 12 ah palek nih Yangon ah an auh hna i zaanriah ei an sawm hna.

Rawldawr chungah palek nih catlap an pek hna i dawr in an chuah cangka in ‘ziah mah catlap hi nan ngeih, cozah thlithup thil a si’ tiin an tlaih hna i thong an thlak hna hi si.

U.N Thil Dik Hlattu bu nih Rakhine state i Rohingya thahnawnnak kong cu ju-ttuh hmanthlak, hmai-tonh interview le adang tehte tampi he a kherhlai dih hnu ah “hihi Myanmar ralkap nih timh ciammaam tein Rohingya muslim miphun ci a hmih hramhrammi si caah ralbawi pawl hi tazacuai hna ding an si” a ti.

Ramkip Misual Biaceihzung (ICC) nih Myanmar ralkap bawi pawl tazacuai khawh an si lai maw ti a check lio si.

Myanmar ralkap le palek bawi pawl cu US, EU le Canada hna nih ‘an ram ah tlawng kho lo ding, an ram ah an ngeihmi chawva vialte kharpiak dih hna dingin le chawlet kho lo ding’ in an kham hna.

Leave a Reply

Your email address will not be published. Required fields are marked *