Myanmar rampumpi ah fak chinchin in ralkap duhlonak langhter dingin khua an khan caah tuni cu khua tampi ah minung million tampi an chuak lai tiah zumh asi.
Zarhteni ah ralkap nih duhlo langhtertu a thah hna caah mipi an thinhung tuk i fak chinchin in ralkap duhlonak langhter an timh, tiah Irrawaddy media nih a thanh.
Kum 1988 August 8 ah “8888” tiin ram pumpi ah minung million tampi nih ralkap duhlonak an langhter lio bantuk kha asi lai. Myanmar ram ah fak bikin ralkap duhlo langhternak 2nak asi lai.
Tuni ralkap duhlo langhternak cu “22222” tiin min an bunh. 22.2.2021 ah tuah ding asi caah “22222 (2 panga)” tiin min an bunh hi si.
Minta/mi tampi nih “Nikhatni cu ralkap duhlo langhternak ah i thawh cio uh” tiin an fans pawl thawng an thanh cio hna.
Tuni cu rampumpi ah dawr le company pawl an khar dih ngawt lai.
Dawr ngeitu tampi nih, “Nikhatni cu ralkap duhlo langhternak ah kan kal lai caah dawr kan khar lai” tiin Zarhteni thok khan an mileng an chimh len cang hna.
Myanmar ram chung dawr nganbik City Mart Holding le Yangon um Thai wholesale center Makro le dawr dang tampi zong nih “Nikhatni cu dawr kan khar lai” tiin nizaan ah an thanh len hna.
Tu zarh cu ralkap duhlo langhternak hruaitu pawl le rian aa thawh duh lomi cozah rianṭuan pawl, ralkap nih a tlaih thluahmah hna.
A thimi le tlaih tongmi an kharh chin lengmang.
Ralkap nih meithal in a kah hna bu zongah, Mandalay mipi cu nizaan kha a tingting bak khua laicer ah an chuak i ṭhut buin ralkap duhlonak an langhter.
Ralkap uknak le 2008 phunghram kan hrawh lai i federal democracy ram kan dirh lai tiin Zarhteni ah Rampumpi Duhlo Langhternak Committee an dirh. Mah committee ahcun; ramkhel party, siangngakchia bu, lothlo bu, biaknak lei bu, nu bu, phungki, sibawi, sihni le caṭial bu, tbk. in bu 25 an i tel hna.
Mah committee nih cun rampumpi khuazakip ah khua duhlo langhternak committee an dirh cio lai i rampumpi ah minung million tampi nih duhlonak kan langhter lai, tiah committee chungtel U Aung Moe Zaw nih a chim. Anih hi Democratic Party for a New Society (DPNS) chairman zong asi.
“Ralchiat awk kan ṭha lo. Atu hin kan ralchiat ahcun, ralkap nih duhlo langhtertu pawl a kan namneh chinchin lai. Mah ruang cun bu kip i fonh in fak chinchin in ralkap duhlonak langhter a herh tiah ka ruah,” ati.
