Tuni ah ralkap le palek nih duhlo langhtertu Chinmi 14 leng an tlaih hna, tiah kan theih.
Hakha ralkap duhlo langhternak ah thawngpang a lami The Hakha Times CEO Pu Lalawm Puia le Hakha khuathar Methodist Church Pastor Rev. Ngun Tum Lian an tlaih hna.
Hakha mipi nih an dawi colh hna i palek sakhan hmai ah “kan thlahpiak hna uh” tiin an au hnawh hna i palek nih “thaizing February 28 12pm ah kan thlah ko hna lai” an ti hna caah tuzaan cu mipi zong palek sakhan in an ṭin cang.
Yangon miphun tling ralkap duhlo langhternak ah aa tel vemi Chinmi 9 an tlaih hna.
Thawngpang thar [update]: Hmasa ahcun Yangon ah tlaih tong Chinmi 6 lawng kan theih hna nain hlat chap tikah tlaih tong minung 9 min kan theih cang hna. Min theih rih lomi he cun 20 hrawng an si lai tiah zumh asi.
An tlaihmi 9 lakah kum 16 Chin tlangval note Salai Okka Aung zong aa tel ve. Anu hmaika bakah an tlaih.
Mandalay miphun tling ralkap duhlo langhternak ah aa telmi Chinmi 2 an tlaih ve hna.
Atutiang kan theih khawh tawk ah tuni ah Chinmi 14;
- Hakha ah 2,
- Yangon ah 9 le
- Mandalay ah 2 tlaih an tong.
Tuni Falam, Matupi, Kalaymyo, Mindat, tbk. lamzawhnak ahcun Pathian dawtnak thawngin Chinmi tlaih an tong ti kan thei rih lo.
Tlaih tongmi vialte an luatnak hnga kan ti khawh ning cio; a hmun ummi nih thazaang, hmun dang ummi nih chawva le thlacamnak in bawm cio hna usih.
Chin state thil le kan Kawlram thil cang hi mi vialte theih dingin share cio hna usih.
Ref: Chin World
