Tuni ah Malaysia COVID-19 mizaw 293 an thi. Ni kum zawtnak aa thokka in atutiang ah a thimi dihlak 13,000 leng an si cang. Tu thla chung te lawngah 4,053 an thi.
Malaysia um Chinmi tampi zong COVID-19 zawtnak nih a kan phak ve. Atu hi a zaw liomi tampi kan um. A nunnak liam cangmi zong tampi an um. Pu Sang Ceu, Rev. Mang Vung Lian, tbk…
Tuni a thimi 293 lakah 251 cu Malaysia rammi an si i a taangmi 42 cu ramdangmi an si, tiah Ngandamnak Vuanci Zung nih a chim.
“44 cu an thih hnu ah an ruak in sizung ah an rat pi hna. 28 cu kan rammi an si i a taangmi 16 cu ramdangmi an si.
“Tuni a thimi 293 cu pa 162 le nu 131 an si. A thimi 293 chungah 249 cu zawtnak dang a ngei ciami an si, COVID-19 nih a den chap hna tikah an tei kho ti lo.
“Atu lio hi mizaw zual thlopnak ICU ah thlopmi COVID-19 mizaw 1,054 an um. Mah chungaah 525 cu thawpeknak seh le oxygen bunh hau tiang an si,” ati.
Selangor state ah a thimi an tambik i 90 an thi. Kuala Lumpur ah 47 an thi, Johor 42 le Pehang 21 an thi. A changtu ah:
- Melaka 19
- Perak 19
- Sabah 15
- Negri Sembilan 9
- Kedah 9
- Penang 8
- Kelantan 7
- Terengganu 5 le
- Sarawak 2 an thi.
Tuni ah COVID-19 zawtnak ngeimi thong 20 deng (19,631) an hmuh hna. Ni kum zawtnak aa thokka in atutiang ah zawtnak ngei hmuhmi dihlak ting 14 leng (1,444,270) an si cang.
Mah chungah ting 12 deng (1,179,046) an dam cang i thong 13 leng (13,077) an thi cang. A zaw liomi ting 2 le cheu leng (252,147) an um rih.
