Tuluk nih nupi caah an firmi Kachin nu kum 6 hnu ah a zaam kho, a fapa a kaltak

Tuluk nih nupi caah an firmi Kachin nu kum 6 hnu ah a zaam kho, a fapa a kaltak

Kachin nu Marip Lu cu liamcia kum 6 ahkhan Kachin state ah rithaisii an eiter hnu ah an fir i China ram ah an kalpi.

“A thluak tlamtling lomi Tuluk pa he hramhram in a kan tthitum ter. Atu le tu an ka tlaihhrem,” tiah Marip Lu nih a chim.

Marip Lu, a chungkhar le a firtu Tuluk chungkhar cu AP media nih interview an tuah hna.

“Chungkhar kong chim cu ngaihchia a si, i chim kan duh lo,” tiah Marip Lu a firtu Tuluk chungkhar i pacan Li Qinggong nih a chim.

Marip Lu nih, “Laiza khua i ka hawile pawl nih Myanmar ramri pawng te ah a ummi China khua Yingjiang ahkhin rawldawr ah rian na ttuan lai tiin an ka lor i China ram ah an ka luhpi,” tiah a chim.

“Zingka i rawl ka eimi ah rithaisii an rak paih. Ka lungfim ahcun, high way cungah rang takin a kalmi motorcycle hnulei ah ka rak tthu.”

“Cun bus an ka cit pi hnu ah taxi ah an ka rawn tthan. Taxi a dir cu a tar tuk rih lomi nuva hna nih nuam takin an rak ka don.”

“Li Qinggong le a nupi Xu Ying cu an fapa Li Mingming pawngah an rak tthu. An fapa cu kum 30 hrawng a si.”

“Nuva hna nih an fapa ihnak khaan ah an ka ihter. Mah zaan cu, Li Mingming nih a taklawng in aa ka ih hnawh i tlaihhrem aa ka timh, nain ruah lo piin a ngol. Hnu ah kaa fiang, a thluak tamtling lomi a rak si.”

“Thla tampi chung, nuva hna nih an ka ven peng. Keimah lawngin inn ah an ka umter bal lo. An ka velh, bia chiachia in an ka hro i hramhram in inn-rian an ka ttuanter peng.”

“Khuasik caan a hung phan. Zaanlei ah, nuva hna nih an ihnak khaan chungah an ka dawh i an pa Li Qinggong nih aa ka tlaihhrem.”

“A kumkum in lileng le ngaihchia tukin ka rak um. Ka chuahnak in kha tluk lilen le ngaihchiat kha ka tuar bal lo.”

“Kum 3 hnu, September 23, 2013 ah fapa ka hrin. Li Qinggong nih aa ka tlaihhrem lengmang nakin ka pawi i ka hrinmi si.”

Li Qinggong nih cun “keimah fa si lo, ka tlaihhrem bal lo, ka fapa Li Mingming fa a si” tiah AP interview ah a chim.

“Ka fapa te cu ka daw kho lai lo tiin ka ruah nain ka dawt tuk. Khatlei in luat/zaam ka duh tuk fawn,” tiah Marip Lu nih a chim.

Phone in bawmh a hal hna

Ni khat cu, hnawm pung chungah phone an hlonhmi a hmuh. A thli tein a hman len nain a ngah lo. Lungsau tein Myanmar ramri Yunnan peng i phone number kip a call.

Sau lakte number kip a call hnu ah, minu nih a tlaih i Kachin holh (kumpi tamtuk chung a theih ti lomi) in a chawnh – Yingjiang ah ka um, ka chungkhat nu Laiza ah tlawn aa timmi um, a ti.

Marip Lu nih a unau nu vapa address a chimh, minu nih innka a va kingh i Marip Lu kong cu a chimh.

Ni tlawmpal hnu ah, Marip Lu nih Laiza khua i an inn a rung chawnh khawh, phone chungin a ttap len.

Laiza ah, Marip Lu kong cu Myu Shayi nih a buaipi. Cozah rianttuan Hkawn Shawng nih Marip Lu cu na phone ahkhan WeChat rak install a ti – WeChat install ahcun a umnak hmun GPS i kuat khawh si.

Hkawn Shawng nih China cozah sinah ‘Marip Lu khamh dingin’ ca a kuat.

Thla tampi a rauh hnu ah, palek motor 2 cu Gucheng khua i Marip Lu inn hmai ah an rung dir. Marip Lu cu palek sakhan ah an kalpi i thil sining a chimh hna.

Nain, suimilaam tlawmpal hnu ah Marip Lu a firtu Tuluk chungkhar cu phone an chawnh hna i ‘rak la uh’ an ti hna ai.

“Palek le mifir an rak i ttuai caah si kho men asiloah palek nih mah case hi zei an rel lo caah si kho men,” tiah Hkawn Shawng nih a chim.

AP media nih palek cu bia hal an timh hna nain an duh lo.

Nain, Plan B an ngei rih; Myu Shayi nih Marip Lu khamh dingin minung thlah a timh.

Duh/lo zongah a fapa kaltak a hau

May 3, 2017 ah, Marip Lu nih a fapa cu ‘coka ah va kalta’ a ti. A kal kar ah, mah hna chungkhar nih an ngeihmi motorcycle lei ah a mitthli he a tli.

Saikal cu aa mongh i na khua pawng khuate ah a kal hnu ah a umnak hmun GPS cu WeChat in Myu Shayi nih a thlahmi pa sinah a kuat.

Van motor pawngah mipa pakhat a dirmi a hmuh i a va tli colh.

“Rianrang tein! Rak lut!” tiah mipa nih a ti.

Ni tampi chung motor in an kal hnu ah, kattaza phah lomi lam an phan.

Myanmar ram a rak si. Marip Lu cu him tein inn a phan.

A zaam kum 1 hnu ah AP nih interview an tuah hi si. “Kum 6 chung aa ka tlaitu Tuluk chungkhar ka huat hna ning kha cu chimpit si,” a ti.

“Nain, ka fapa ka ngai tuk i chawnh ka duh tuk cang caah June thla ahkhan Li Qinggong cu phone ka chawnh. Ka fapa aa ka chawnhter duh lo, ‘thil sining AP media sinah na phuang lai maw ka kamh hmasa’ aa ka ti,” tiah a chim.

Marip Lu cu a fapa ngai in lilen a tuar tthan. A fapa laknak khua lawngte a ruat peng.

Nain, amah luatnak dingah khuakhangtu nu Hkawn Shawng nih, “Marip Lu cu a mawh hin lo, nain a fapa lak cu a si kho lomi thil si. Kanmah bu nih hin kum 2011 in atutiang ah fir a tong Myanmar nu 200 leng kan khamh cang hna. An duh/lo zongah an fale cu an kaltak dih ko hna,” tiah a chim.

Tuluk nih nupi caah Myanmar nu an fir hna

“Tuluk pa pawl nih nupi caah Myanmar nu an fir peng hna. Kum 2010 thokin kum fatin Kachin state ah buaktlak in nu 35 peng an fir hna nain liamcia kum tlawmpal cu kum 1 ah nu 50 hrawng an fir hna, a zual chin lengmang,” tiah Myu Shayi nih a chim.

“Kum 2010 thokin Myanmar nu 1,100 leng Tuluk pawl nih nupi caah an fir cang hna,” tiah Myanmar cozah cazin ah aa ttial.

Liamcia kum 20/30 lio i Tuluk cozah nih fa 1 lawng ngeih dingin upadi a rak ser lio ahkhan minung tampi cu fapa lawngte an rak i thim, fanu an pawi ahcun an thah.

Mah ruangah, nihin ahcun Tuluk/China ram ah nu nakin pa an tam deuh cang. Pa ting 300 leng an hlei, an thih tiang nupi a tong ding an si ti lo.

Cucaah, Tuluk pa tampi cu innpa ram ah ‘nupi fir’ in an ttang. Puaisa hrokhrawl pawl sinah tangka an pek hna i puaisa nih nu cu Tuluk ram ah cu/kha rian na ttuan lai tiin an hlen hna i nupi caah an kuat hna.

Tuluk pa cheukhat cu nupi duh ah ramleng ah rianttuan dingin an kal.–AP le Myanmar Times

Leave a Reply

Your email address will not be published. Required fields are marked *