Tuksapur: US Rampumpi ah Trump Ṭanhtu Pawl nih Meithal He Sandahpiah an Timh

President Donald Trump ṭanhtu pawl nih meithal le hriamnam he US rampumpi ah sandahpiah an timh caah mi vialte an thinphang dih.

Hmai zarh Nithumni (January 20) ah President-thimmi Joe Biden cu US President ṭuan dingin biakamnak tuah ding asi caah January 16 in 20 tiang Trump ṭanhtu pawl nih meithal le hriamnam he rampumpi ah sandahpiah an timh, tiah FBI nih a thanh.

California state cozah lutlai Gov. Gavin Newsom nih, “hopaoh ralring taktak in kan um dih cang,” tiah a chim. New Jersey state cozah lutlai Gov. Phil Murphy nih, “sandahpiahtu tlangtlak khawh lo dirhmun phak hrim kan duh lo,” ati ve.

Washington state cozah lutlai Gov. Jay Inslee nih, “kan state ah zei bantuk buainak hmanh kan cohlang lai lo,” ati ve cang.

Joe Biden biakamnak puai an tuahnak ding US Rampumpi Hluttaw (Capitol) veng dingin National Guard ralkap 10,000 leng an timh cang hna. US state 50 ningin an khualipi kip ah palek le ralkap tam taktak timhcia in an chiah dih cang hna.

Kan hnu zarh zongah Donald Trump nih “Hluttaw ah Biden teinak fehter an timh caah kham hna uh…” tiin a ṭanhtu pawl a forh hna ruangah minung thong sawm tampi nih Hluttaw cu an baoh i thimnak result fehter dingin meeting a tuahmi MP (representative le senator) vialte an zaam dih. Suimilaam tampi chung Hluttaw cu an uk hnu ah palek le ralkap nih an chuh ṭhan hna.

Hluttaw baohtu nu pakhat cu Hluttaw chungah palek nih an kah i a thi. Hluttaw palek pa pakhat cu Trump ṭanhtu pawl nih fak tukin an velh i a thaizing ah a thi. Trump ṭanhtu dang 3 zong Hluttaw hmai ah ngandam lonak in an thi. Minung 5 nunnak a liam.

Atu lebang cu US rampumpi (state 50) bakah meithal le hriamnam he sandahpiah an timh caah thisen a luang ṭhan lai maw, minung zeizat dah an thi rih lai, tiah mi tampi thinphang in an um.

Michigan state lebang ahcun, Trump ṭanhtu pawl nih an state cozah lutlai Gov. Gretchen Whitmer fir an timh caah kan hnu thla ahkhan FBI nih pa paruk (6) an tlaih hna. An state khualipi Lansing ah zapi lak meithal ken an khap. An state cozah sihni bawizik Dana Nessel nih “mipi hohmanh vak hlah uh, ralring tein um uh” tiin mipi ralrin a pek hna.

Trump nih “thimnak a dik lo, mee dik lo tamtuk a um…” tiin atu le tu a chim peng ruangah atu dirhmun tiang kan phaknak hi si. Trump nih “mee dik lo tamtuk a um…” a timi cu nihin tiang biaceihzung ah zeihmanh tatte a chuahpi kho fawn lo, a hrokhrawl lawngte si. US mipi ṭhencheutu le buainak chuahter tu, mi nunnak liam tertu asi.

Cozah ṭuanvo ngeitu nih, “Biden biakamnak puai tuah dingin ready kan si cang. Hluttaw Palek, Ralkap (Pentagon), Lahwahkah (DHS) le Washington D.C palek vialte timhcia dih kan si cang,” an ti.

Hluttaw Palek lutlai Yogananda Pittman nih, “Hluttaw cu him tein kan ven hrimhrim lai tiah bia kan kamh hna,” ati.

Ralkap bawi Army Gen. Daniel Hokanson nih, “National Guard ralkap 10,000 leng Washington ah timhcia in kan chiah cang hna. A herh cun ralkap 5,000 zong auh chap dingin kan timh dih cang.

“Sandahpiahtu pawl kham dingin kan i redi tuk cang. Minung zong redi kan si, kham ningcang simanking zong kan suai dih cang,” ati.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...