Tuanbia thar: Israel PM nih avoi 1nk bik UAE ram a tlawn

Date:

Share post:

Israel le a innpa muslim/Arab ram pawl cu aa hua tukmi le ral tiang aa tumi an si. Laimi zong nih ‘6 Days War’ kan ti lengmangmi kha kum 1967 ah Israel le a innpa muslim ram pawl ni 6 chung ral an i tukmi asi. Cucaah Israel cu muslim ram vialte nih tlawn an phih dih i UAE he zong an i tlawng bal lo, sinain mah tuanbia cu a dong cang, i tuanbia thar an ṭial cang.

Israel ram hruaitu Prime Minister Pu Naftali Bennett (hmanthlak) cu nizaan December 12 ahkhan muslim ram vialte lakah a rum bik si vemi United Arab Emirates ram khualipi Abu Dhabi ah a tlawng.

“Kan ram 2 kar pehtlaihnak ṭhat ter chin dingin ka tlawnmi asi. Atu lio hi kan i pehtlaihning a ṭha tuk, i kan pehzulh a hau,” tiah Israel PM nih a chim.

Israel le UAE ram hruaitu cu aa tlawng bal lomi an si. Tutan hi avoi 1nk bik asi.

Ni kum ahkhan, Israel le UAE ram cu khat le khat i tlawn dingin le sipuaizi zong tuahṭi dingin le tanzung zong on veve dingin i remnak sachoh an tuah. Mah cangka in Israel rammi le UAE rammi cu an i tlawng colh cang, Nain Israel PM nih cun tutan hi avoi 1nk bik UAE a tlawn si – Israel he remnak sachoh a tuahmi 3nk Arab ram asi. Amah hlan ah Jordan le Egypt zong nih Israel he remnak sachoh an tuah cang.

Hnu ah Arab/muslim ram a si vemi Bahrain le Morocco zong nih remnak an tuah ve. Sudan ram zong nih tuah ve dinging timhtuahnak a ngei nain remnak (pehtlaihnak) tling taktak a tuah rih lo. Ni kum US President Donald Trump hruainak in Arab ram 4 (UAE, Bahrain, Morocco le Sudan) nih Israel he remnak le pehtlaihnak an tuah hi si.

Pu Benett hi UAE ram a tlawng hmasa bikmi Israel PM asi ko nain ‘a tlawng hmasabikmi Israel cozah reng sang’ cu asi lo, June thla ahkhan Israel Ramdang Vuanci Pu Yair Lapid cu UAE ram ah a rak tlawng cang, i Abu Dhabi khuapi ah Israel Tanzung onnak puai a tuah.

A hmai thla July ah UAE nih Israel ram Tel Aviv khuapi ah UAE Tanzung a on colh ve. An i pehtlaih ning a ṭhat tuk ning le zoh an dawh tuk ning hi nungak tlangval aa duh kami an lo.

Israel cu muslim ram pawl nih an huat tuk ko nain atu cu a ṭhancho tuk cang caah a herh tuin an herh cang. Israel he an i pehtlaih thawngin an ram sipuaizi tampi a ṭhangcho ding asi caah UAE le musim ram cheukhat nih cun an pehtlaih cang. Iran he cun ti le mei bantukin an i hua peng rih ko.

Israel PM cu September thla zong ahkhan Egypt ram a tlawng i Egypt President he tonbiaruahnak an ngei. December 9 zong ahkhan Israel Ramdang Vuanci cu Egypt ah a tlawng ve.

Israel Ramdang Vuanci Pu Yair Lapid cu December thla ah Egypt a tlawng

Israel PM nih Egypt ram a tlawn lonak kum 10 asi cang. Israel PM nih a donghnak bik Egypt a tlawn cu kum 2011 ahkhan asi i mah lio PM Benjamin Netanyahu nih a rak tlawn. Mah hnu cun Egypt nih a huat tuk i kan tlawng ti hlah a ti caah a tlawng kho ti lo.

Kum 10 hnu ah atu lio Israel PM thar nih September thla ah a tlawn hi si.

Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

US Senator Young: Myanmar ralkap hi a tuhmi theipar zunter caan acu cang

US um Chin miphun a kan bawm zungzaltu US Hluttaw Sang MP/Senator Todd Young nih, "Phungninglo Myanmar ralkap...

US Chin company Yoshi nih Chinram dothlennak caah $50,000 a hlut

US ram i Chin company nganbik a simi Yo-Health (Yoshi) nih Chinram dothlennak caah $50,000 (Kawlram ting thong...

Jenevy Sui: Nan thatho seh tiah Dr. Ro Ding bia kaan hrawmh hna

Awṭha minthang Jenevy Sui nih, "Mah ca a reltu paoh nan thatho seh tiin Dr. Ro Ding bia...

Falam pengah Myanmar ralkap 25 an thah chap hna

Falam pengah ralhrang Myanmar ralkap 25 kan thah hna, tiah CNDF nih a chim. January 16 ah 17...