Tu zingka in chun tiang Mindat mipi le ralkap an i kap

- Advertisement -

Chin ram peng 9 ah Chinram Runvennak Ralkap (CDF) an dirh i nizaan April 26 thokin nihin tiang Mindat khuapi ah mipi hremtu ralkap he fak piin an i kap, tiah Myanmar Now media nih a thanh.

Zahan ah zaanlei ah Mindat khuami CDF le ralkap an i kap. Ralkap 15 hrawng an thi. Tuni zong an i kap ṭhan.

“Tu zingka 9:30am hrawng in ral aa thok. Anmah ralkap lei nih hriamnam ngan RPG pawl in an kan kah peng. Atu hi ral a fah tuk lio asi,” tiah Chinland Defense Force (CDF) chungtel Mindat khuami mino hruaitu pakhat nih tu chun ah a chim.

Zahan zaanlei ah Mindat khuapi ah an i kah hnu ah, cunglei ralkap nih tu zingka ah mawṭaw 9 bakin ralkap tam taktak Mindat khuapi lei ah a thlah hna. Mindat khua an phak hlan meng 5 hrawng ah khuami nih an kham kah hna i zingka in chun hnu tiang fak tukin an i kap.

April 24 ah Mindat khua Aung San dar milem pawngah ralkap duhlonak sandah an piah lio ah palek le ralkap nih minung 6 an tlaih hna. “Thlah hna uh” tiin Chinram Runvennak Ralkap (CDF) nih an hal hna nain an thlah duh hna lo caah CDF nih an kah hna i tuni tiang kahnak aa peh hi si.

Chin Nuhrin Covo Bu (Chin Human Rights Organization – CHRO) nih, “April 24 an i kah lio ah Myanmar ralkap 3 an thi,” tiah thawng a thanh.

Nizaan April 26 ah, Matupi peng in Mindat ah mawṭaw in a kalmi ralkap pawl cu Mindat khuami CDF nih khua luh lai ah an kah i fak piin an i kap.

Nizaan an i kah lio ahcun Myanmar ralkap 15 hrawng an thih pinah hliam tongmi zong an um, tiah RFA nih a thanh.

CDF chungtel Mindat khuami pakhat nih, “Nizaan April 26 kan i kah lio ah Myanmar ralkap a thimi zat hi fiangfai in kan thei kho rih lo, nain 10 leng cu an thi ko,” tiah tuni ah a chim.

Lainawng le lihchim ralkap media nih cun “Ralhrang Mindat khuami nih mipi himnak ṭuanvo latu ralkap le palek an kah hna caah ralkap 1 a thi i 3 hliam an tong,” tiin tuni ah thawng a thanh.

Mindat khuami (CDF) nih cun ram vaihnak caah hmanmi voio 1 puah fatin kuan/zenthawng thlen a haumi innser puahceh le Lai meithal hmangin ralkap an doh hna, tiah khuami pakhat nih a chim.

“Mindat khua cu dawr zong an khar dih hna. Inn zong an khar dih hna. Lam ah aa chawkmi zong an um huaha lo,” ati.

Sagaing ramṭhen Kalay, Tamu, Yinmabin, tbk peng pawl zongah khuami nih puahceh le an hmuhmi hriamnam paoh in ralkap an doh ve hna i tam ngai an thah khawh ve hna.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...