Tu hnu kum 7 chungah Falam peng khuate 100 leng mei an ngah lai

  • 2025 – 2026 Budget Kum ah Falam peng khuate 100 leng mei an ngah lai

Chin state Falam peng khuate 100 leng cu a ra laimi 2025-2026 Budget Kum ah lekṭhik mei an ngah kho lai, tiah Lekṭhik le Sehtha Vuanci changtu Dr. Tun Naing nih a chim.

August 16 ah tuahmi Amyotha Hlutdaw meeting ah Chin state MP Pu Zung Hlei Thang nih, “kum 2030 ah Kawlram pumpi mei ngahter dih dingin khuakhan sikaw, Falam peng khuate vialte hi zeitin dah mei pek nan timh ve?” tiah a halmi cu hitin Lekṭhik le Sehtha Vuanci changtu nih a leh.

“Falam peng khuate 167 chungah 105 cu 2025-2026 Budget Kum tiangah mei kan pek khawh hna lai. Khuate 62 balte hi cu lam hla tuk ah an i ṭhek dih hna caah le an khua fingtlang umtu ning ruangah, ram pumpi mei peknak ‘Maha-dat-aa-line’ in mei pek khawh ding an si lo. Cucaah, solar silole an khua pawngah ti-lekṭhik hme deuh tuahpiak in mei pek an si te lai,” tiah vuanci nih a chim.

Falam peng ah khuate 167 an um i atutiang ah khuate 15 cu Maha-dat-aa-line in mei pek an si cang.

2018-2019 Chin state cozah budget in khuate 2 ah lekṭhik an tuah lio asi caah tutan budget kum dongh ahcun Falam peng khuate 17 nih Maha-dat-aa-line mei an ngah cang lai, tiah Vuanci Tun Naing nih a chim.

“Pharlung khua telh in pawngkam khuate 27 ah Maha-dat-aa-line mei peknak caah 66/11 KV 5MVA mei tha dawpnak zung 1 cu 2019 in 2022 chungah JICA cawihmi tangka in kan tuah lai.”

KV = kilovolt, MVA = Mega Volt Amp

“Tlangzarh khua telh in pawngkam khuate 18 ah Maha-dat-aa-line mei peknak caah 66/33 KV 10MAV mei ṭhennak zung 1 le 66/11KV 5MAV mei ṭhennak zung 1 cu 2023 – 2024 Budget Kum ah Rampi Budget in kan tuah lai.”

“Satawm khua telh in pawngkam khuate 43 ah Maha-dat-aa-line mei peknak caah 33/11 KV 5MVA lekṭhik zung 1 cu 2023 – 24 Budget Kum ah Rampi Budget in kan tuah lai.”

“Cucaah, khuate 88 cu ram pumpi mei peknak (Maha-dat-aa-line = National Power Grid) in mei an ngah kho lai,” tiah vuanci nih a chimchap. — Khonumthung

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.