Trump Nih Phungninglo Mipem Chungkhar Thhencheunak A Tuah Ruangah Ngakchia Pawl Harsatnak An Tong

Kan hnuthla thok in khan Trump nih phungninglo mipem pawl cu dawi dih a timh hna i chungkhar tthencheunak tiang a chuah caah nulepa he ai tthenmi ngakchia pawl cu harsatnak fakpi an tong.

Ka ram chungah phungninglo minung ka umter hna lai lo tiah Trump nih a ti caah phungning loin a ummi paoh cu a dawi cuahmah hna. Cu a dawimi hna chungin cheukhat pawl cu US ram i an umnak a sau tuk cang caah US ram ah fa a ngei mi zong tampi an um.

US ram chung i a chuak mi ngakchia cu an chuah sinin rammi ah cohlan an si caah cu phungninglo a ummi hna nih an hrinmi an fale cu phungning minung rammi ah an cang(US ram i an chuah caah).

Cu tik ah nulepa cu phungning loin a ummi an si caah Trump policy ningin an ram cio ah dawi le kuat an si. Cu caah US rammi sinak a ngeimi an fale he ai tthen mi hi an tam ngai ngai. Nulepa nih kaltak in zohtu ngei lo ngakchia pawl hi minung 2,000 tluk an si cang.

Hi kongah UNHCR lei ttuanvo ngeitu Filippo Grandi nih cun hi thil an tuah mi hi cu cohlan khawh hrimhrim a si lo, hiti tiangtiang cu an tuah awk a si lo tiah US cozah cu a mawhchiat ve. Cu ngakchia pawl nih an nulepa an ngaihnak hna le an ttah thawng cu media pakhat nih record a tuah. Kum 4-10 kar lak ngakchia tete ttah thawng cu theih khawh a si.

Zeibantuk dirhmun an si ko zongah ngakchia tete an nulepa sin in tthen ti hi cu a palh tuk mi biakhiahnak a si tiah Grandi nihcun a chim chap. Asinain Trump nih cun cacawn nikaht ni ahkhan US cu mipem le ralzaam chiahnak camp ah serding ka duh lo tiah a ti ve.

Chirhchan:BBC

 

Leave a Reply

Your email address will not be published. Required fields are marked *