22.1 C
Hakha
Saturday, October 23, 2021
- Advertisement -

Ṭial Tharmi

Trump: Nan ka ngai cang maw?

Trump nih “Nan ka ngai cang maw?” tiin ṭhitum puai zawhtu pawl a hal hna.

US President hlun Donald Trump a ṭanhtu John le Megan Arrigo cu Florida um Trump hotel Mar-a-Lago ah ṭhitum puai an tuah i Trump cu biachimnak caan an pek.

Trump nih mic cu aa lak i “Nan ka ngai cang maw?” tiin puai zawhtu pawl cu a hal hna.

“Thawngpang ka zoh ah ramri kong, China kong le Iran kong a tam ngaite.

“Sachoh ah minsen thut dingin redi kan rak si cang, zeipaoh tuah dingin redi an rak si cang, zeipaoh an rak tuah ko hnga. Mah lio cun mahpa [Biden] a hung kai i sipuaizi ka phihmi vialte a on dih i atu cu nanmah he biaruah kan duh a ti hna,” tiah a bia peh.

President Biden nih Iran sipuaizi phihmi cu a onpiak rih lo, nain Trump nih “Iran hi nuclear sachoh a buar caah ramkip nih a sipuaizi phihpiak uh” tiin UN Security Council a halmi tu cu a leet piak.

Mah hnu ah, US ram thlanglei Mexico ramri in ramdangmi kum tlinglo ngakchia a zaza zohkhenhtu upa loin US an luhmi kong, US ah ramdangmi tam tuk liangluang an luhmi kongah Biden a soisel.

“Ramri boruak a ṭha lo. Atu hi a chia bik si. Ngakchia zeitin dah an tuah hna, hnawm lakah an umter hna. Hohmanh nih an hmuh bal lomi tlukin a thurhnawmmi lakah an umter hna. Hi bantuk hi a um bal lo,” ati.

Trump acozah lio ah, Mexico ramri in US a lut ramdangmi chungkhar pawl cu ngakchia le nulepa a dangdang in an rak chiah hna caah Democrats pawl nih thi deng in Trump an rak soisel

Mah hnu ah, president hlun nih naite thimnnak i Biden sinah a sunghmi kong a lungtlinlonak a chim.

“Vote 66 millions na ngah an ka ti, thimnak a hung dih. Vote 75 million bak ka ngah, zei dah cang ti cu nan hmuh cio ko khah,” ati.

Biden nih vote 80 million leng a ngah.

A donghnak ah, “Aa dawh in a sunglawi tukmi nuva nan si” tiin aa ṭhiummi John le Megan Arrigo lawmhpinak bia a chim.

Trump nih a ṭanhtu pawl ṭhitum puai ah bia a chim hi atu lawng si lo.

President a rak ṭuan lio kum 2019 zongah, New Jersey um a kohti tuknak hmun ah ṭhitum puai a tuahmi monu le mopa nih biachimnak caan an rak pek i puai zawhtu vialte cu “USA! USA!” tiah an rak au viar.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -