President Trump nih, “Biden biakamnak puai ah kai tel lai lo ati,” tiah Trump vorhlei kut Fox News nih a thanh.
Joe Biden cu hmai zarh Nithumni (January 20) ah 46nak US President ṭuan dingin biakamnak an tuah lai.
Obama, Bush, tbk. liamcia president tam deuh cu anmah hnu president ding biakamnak puai ah an telpi tawn hna nain, Trump a lungput cu zohchun awk a tlak lo ngaingai.
Trump cu Nihumni zingka ah president inn White House in chuah aa tim. President vanlawng Air Force One in Florida ah zuan aa tim. President asi ti lo hnu cun Florida state i Palm Beach khua um a inn ah um ai tim, tiah NBC News nih a thanh ve.
Trump cu Biden biakamnak an tuah hlan paoh president asi rih. Biden cu US Rampumpi Hluttaw (U.S. Capitol) ah 12pm E.T. hrawngah biakamnak tuah an timh caah mah hlan cu Trump nih Air Force One a hman khawh rih. Florida cu chun hrawngah a phan te lai.
White House in a umnak ding Florida state kalnak caah vanlawng dang cit a duh lo, president vanlawng Air Force One thengte in kal a duh, tiah min langh a duh lomi White House rianṭuan nih an chim.
Atu hi Trump chugkhar cu thil phorhnak mawṭaw in White House i an thil pawl Florida state lei ah an ṭhial cuahmah liopi asi.
