US president hlun Donald Trump company le a company tangka lutlai Pu Allen Weisselberg, kum 73 cu ‘ningcang tein tax nan pe lo’ tiin New York Cozah nih taza a cuai hna.

Trump company tangka lutlai Pu Allen Weisselberg cu “tax hrial na duh caah $1.7 million income na thuh,” tiin taza an cuai.

New York cozah sihni pawl nih, “Kum 15 chung felfai tein tax an pe lo. Tax hrial dingin income thuhnak caah Trump company nih a company lutlai pawl cu inn hlan man le sianginn man a liampiak hna,” an ti.

Trump company sihni pawl le pu Weisselberg nih ‘upadi nih a onh lomi kan tuahmi um lo’ an ti ve.

Sinain amah Trump pumpak cu taza an cuai lo.

Trump company ‘Trump Organization’ cu an chungkhar company asi i hotel, kohti kun le innlo tampi a ngeimi si. Vawleipumpi huap in cauk sachoh, TV shows le Trump min bunhmi inn sangpipi zong an tuah.

Manhattan district cozah sihni le New York state cozah sihni pawl nih Trump company cu felfai tein tax a pe lo tiin a kumkum an puh i an hlat hnu ah tutan hi avoi 1nak taza an cuai si.

Tazacuainak kong cu Nilini ah zapi theih in an thanh. ‘Ningcang tein tax nan pe lo, nan sipuaizi cazin zong tax hrialnak caah lih le hrokhrawl in nan tuah’ an ti hna.

“Company lutlai pawl nih anmah le company miaknak caah tax an hrial hi si. State le rampi mipi tax tangka in a thli tein lahkhah an i kaih,” an ti hna.

Ramkhel ruangah asi maw?

Trump le a phu nih, “Taza an kan cuaimi hi ramkhel ruangah asi. Trump nih 2024 ah president i cuh/lo kai sungphiat cang ati cangka in democrats pawl nih kan ke phelhnak caah an tuahmi si,” an ti.

Trump nih, “Ka company taza an cuaimi hi kalsual Democrats pawl nih ramkhel miaknak caah an tuahmi si.

“Mah nih hin kan ram ṭhencheunak fakpi a chuahter,” ati.

Nain tazacuaitu New York cozah sihni pawl nih cun ‘ramkhel he zeihmanh aa sai lo’ an ti ve.

Trump company le a phu nih cun ‘kan palhmi um lo, biaceihzung ah kan doh peng lai’ an ti.