US President hlun Donald Trump nih, “2024 ah US President Zung White House kan lak ṭhan lai,” tiah a ṭanhtu mipi bia a tiam hna.
Trump cu zahan zaan kha Arizona state ah a ṭanhtu mipi thong tampi sinah bia a chim i atu bantukin a chim hi si.
2024 ah US President Thimnak tuah ṭhan ding asi. ‘Kai cuh ṭhan lai’ ti cu a chim lo nain “2024 ah White House kan lak ṭhan lai” ati caah i cuh ṭhan dawh asi.
Zahan ah biapi bikin a chimmi cu ‘2020 thimnak kan tei, thimnak an fir’ ti kha asi rih ko.
Trump cu a ṭanhtu pawl nih US Hluttaw an baoh i minung 5 an thih hnu in social media tumtlang vialte; Facebook, Twitter, Instagram le Youtube nih an kham/ban caah atutiang social media ah hmuh khawh asi ti lo.
Cucaah amah tein ‘Truth Social’ timi social media company dirh a timh i hmai thla February ah a dirhte lai, tiah amah ruahnak petu pawl nih media ah an chim.
Trump cu kum 1 chung social media ah a lang ti lo nain atutiang ahcun Republican party member vialte lakah mipi nih uar bikmi asi peng rih ko.
2024 ah president aa cuh lai/lo cu thawngthanh le fehter a um rih lo nain, aa cuhte ko lai tiah ramkhel thiamsang tampi nih an zumh.
Amah zong nih zahan zaan ah ‘2024 ah White House kan lak ṭhan lai’ ti caah aa cuh ding cu alo ngai ko.
2024 ah Biden le Trump president an i cuh ṭhan ahcun ho dah na vote lai? Comment …
