Tonzang peng, Haicin auhsuh, Tuivialzang khuate ah primary sianginn cachim sayama Dim Lun Mang cu Binok timi pa nih November 17 zaan ah meithal in a kah thah.
“Sayama Dim Lun Mang (kum 28) cu November 17 zaan sml 9.30 hrawngah Tuivialzang khua ah nupi le fa 3 a ngeimi Binok nih meithal in a kah” tiah Haicin khuabawi nih a chim.
“Sayama nu hi Tuivialzang khua ah a umnak sau ngai cang. Binok he pumpak kongah bia an i al. A hlan zongah bia an i al bal tiah an ti. Nain, a ruang bik taktak cu kan thei rih lo” tiah a chimchap.
Thil a cannak hi cozah rianttuan pawl umnak inn ah a si i sayama Dim Lun Mang cu siangngakchia 2 he an um lio ah Binok nih meithal in a kah. Cun, Binok cu India ram lei ah a zaam.
Sayama Dim Lun Mang cu Tedim peng, Khaikam khuami a si. Binok nih meithal in a kah hnu ah Cikha khua ah an kalpi. Cikha khua in motor in Tonzang khua an kalpi i lampi an a nunnak liam.
“Sayama nu a thattu Binok cu tlaih dingin India palek sinah thawng kan thanh cang” tiah Cikha khua palek bawi Myo Min Oo nih a chim.
Mithattu Kate miphun Binok cu India ram, Behiang khuami a si i nupi 2 a ngeih hnu ah Myanmar ram, Haicin khua ah nupi a tthi tthan i fa 3 he khua a sami a si.
Haicin khua in meng 9 hrawng a hlatnak Tuivialzang khuate ahhin inn 14 hrawng a um i India-Myanmar ramri ah a ummi khua pakhat a si. Haicin auhsuh cu India ram in Kate tapung pawl an luhchuah ngainak hmun a si i Kate miphun tampi nih Chin nu an tthit hna. – Khonumthung
