9.8 C
Hakha
Friday, January 17, 2020
More

    Tial Thang nih Kim a tei: Aa ka zohtu nan dihlak cungah tampi ka lawm

    Follow Us

    99,809FansLike
    376SubscribersSubscribe

    Ṭial Tharmi

    - Advertisement -

    Kuala Lumpur — Chinmi nih ONE Championship MMA zaangleknak ah kan i ngeihchunmi Tial Thang @Tial Cung Thang nih tuzaan ah South Korea pa Kim Woon Kyoum cu diriam taktak in a tei.

    Round 3 an i ṭhuat hnu ah biakhiaktu 3 nih an dihlak lungtling tein “Tial Thang nih a tei” tiah bia an khiah.

    Malaysia um Chinmi tam taktak le Kawlrammi a thongthong bak nih an i ṭhuatnak bual chungah an va zoh. Dragon Leg nih teinak kut a thlir cu Chinmi an i lawmh tuk ning hi khuaruahhar si. An i lawmhnak au thawng nih bual a kheh dengmang.

    Laimi cheukhat cu an i lawmh tuknak ah a mitthli chuakmi zong an um.

    Tial Thang nih a tei cangka in Laimi lawmhnak au thawng nih bual a kheh dengmang

    Teinak a hmuh cangka in ONE Championship caantlaitu pa nih bual chungah bia a hal i Tial Thang nih, “A rak ka zohmi nan dihlak cungah tampi kaa lawm” tiah Lai holh tein Laimi a fans pawl sinah lunglawmhnak bia a chim.

    A hmun ah a zohtu Laimi caah cun vawlei vanraam asi ko. Malaysia ah kum 10 leng a um cangmi Laimi tampi nih “Malaysia ka um chungah tu zaan tlukin kaa lawmh a um bal lo. A turu lawlaw…” tiah an chim len.

    Malay holh zongin “Malaysia, kaa lawm tuk…” tiah a chim.

    ONE Championship ring chung bakin Lai holh in lawmhnak bia a chim cu lung a hmui kho tuk

    Tial Thang cu bantamweight ah aa phomhmi si. “Bantamweight vialte ra chuak uh, 2020 ah kan i phomh hna lai. Nan dihlak kan rat hnawh hna!” tiah ONE Championship i bantamweight vialte a singkhaw dih hna.

    Round 1 in 3 tiang Tial Thang nih Laih paih in a tengh lengmang. Round 2 lebang ahcun Tial Thang nih a tengh i KO in a tei dengmang.

    Tial Thang nih a tengh lio

    Round 3 hrim cun Tial Thang nih a tei tuk. Lai paih a rak thiammi hrim nih a bawmh tuk.

    World champion 2; Aung La Nsang le Martin Nguyen bak nih Lai puan i aih in bual kam ah an thut hnawh i nipiah an tuanpiak cu a mangtara lawlaw khi si.

    South Korea pa Kim nih tlaih in a zuanh lengmang nain Tial Thang nih aa khamh khawh pinah amah tu nih a tlaih lengmang. Lai paih in bual ṭuang ah ‘kung’ tiin a tengh hrim cu Laimi caah cun lung a hmui kho tuk.

    A hramthok in a dongh tiang Tial Thang nih zei lei paoh in a tei tuk. Tial Thang a thangcho taktak cang. Yangon i aa phomh lio he tahchun ahcun atu cu cakei bak si ko cang.

    US ram ah a nupi le an fale 2 he khua a sami Tial Thang cu 2019 thokka ah a chuahkehnak Myanmar ram aiawh in ONE Championship ah a lut i avoi 1nak bik Yangon ah Cambodia pa Rin Saroth he an i phomh i a tei.

    Tial Thang nih a thongh lio

    Tutan hi avoi 2nak aa phomh si i teinak a hmu rih. Atutiang ahcun a hlawhtling ngaingai.

    A khuasaknak US ram zongah Lai paih aa pai tawn i champion a ngah lengmangmi asi.

    Nawlnak: Kan website chung ca hi website dangah copy piak lo dingin kan in nawl hna.
    Tial Lian Thang
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.