ONE Championship MMA velh zuamnak ah Chinmi kan ngeihchun Tial Cung Thang @Tial Thang nih, “Kuala Lumpur, kan i tong zau lai!!” tiah tuni ah a chim.

“Mah chiandeih tum he hin boxing ka cinh liopi asi. Tutan i ṭhuatnak caah biatak tein ka cinh. Ka cinhmi piah kan duh tuk cang hna. Tutan cu hmasa he ka dannak nan hmuh ko lai. Kuala Lumpur, kan i tong zau lai!!,” ati i a cinh lio video a tar.

December 6 ah Kuala Lumpur um Axiata Arena bual ah South Korea pa he aa phomh ding an si.

Tial Thang cu Aung La Nsang nih a hung zulhte lai.

“Dragon Leg” tiin mindin bunhmi US khuasa Tial Thang cu March thla ah avoi 1nak bik ONE Championship ah aa ṭhua.

Yangon ah Cambodia pa Rin Saroth he an i ṭhua i a tei caah “Chinmi chungin MMA ah tuanbia a ṭial hmasa biktu na si. Teinak na hmuh caah Myanmar ram le Chin miphun min na ṭhatter…” tiin CNF le All Chin Society Yangon nih lawmhpinak roca an rak pek.

Tu kum thokka ah a chuahkehnak Myanmar ram aiawh in ONE Championship ah a lutmi Tial Thang cu tutan hi avoi 2nak aa ṭhuat si lai.

Dragon Leg hi Lai paih zong a thiam ngaimi asi. US ram ah tuahmi Lai paih pawl ah voi 5 tiang champion a ngah cang. July thla zongah World Paih Championship (WPC) nih tuahmi Middleweight World Champion a co.

Cambodia pa he an i ṭhuat lio zongah Lai paih in voi tam ngai a tengh. A donghnak round hrim ahcun Tial Thang nih a tengh peng i a tei deuh ngaingai.

Chiandeih tum he an cinh lio video

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...