Tial Thang a sung ruangmang – VIDEO

- Advertisement -

Tial Thang cu tuzaan ah South Korea pa Song Min Jong nih a tei ruangmang.

Round 2 tiang ahcun Tial Thang nih a tei deuh ko nain Round 3 ahcun a tha dih i Song Min Jong nih duh tawk bakin a ṭhuat.

Round 1 minutes 4 tiang cu Tial Thang nih a tei deuh ngai. An i ṭhuat cangka in South Korea pa nih a tlaih i bual vampangah a det nain Tial Thang nih Lai paih bakin ṭuang ah ‘kung’ tiin alu bakin a tengh. Song Min Jong a kehlei mit kam tlek lakin a ṭhuat. Voi tam ngai a thongh.

Tial Thang nih a tengh lio

An thawh hnu ah Tial Thang nih vorhlei kuttum in dawh taktak in a kha ah coih. Song Min Jong nih tengh dingin a tlaih i vampang ah det nain Tial Thang nih a kio in ṭhuat i a teng kho lo.

Song Min Jong nih a kehlei kuttum in dawh taktak in a ṭhuat ve. Tial Thang nih vorhlei kuttum in dawh takin a ṭhuat ve. Mah tiang ahhin cun Tial Thang nih a tei tuk.

Nain, round 1 dihnak minute 1 aa duh bakah Song Min Jong nih kehlei kuttum in a pehpeh in voi 2 bak a ṭhuat ṭhan. A vorhlei ke in a chuih, a thut i a ke in tlaih i a thluk.

Mah lio hin Song Min Jong nih sum phomh bakin a phomh i Tial Thang a kehlei mit tang ngan tukin a phing, thi chuak i a duk dih

Mah hin cun Song Min Jong nih ngakchia tuah bakin a tuah. Keh he vorh he sum phomh bakin a phomh thluahmah i Tial Thang cu a kehlei mit tang ngan taktak in a phing. A hngawng in reh colh hoi i a hloh dengmang. Round 1 dih hlah sehlaw mah lio hin Song Min Jong nih knockout bakin a tei beh lai.

Round 2 hi cu a dongh tiang an i tluk ngai, nain Tial Thang nih tlawmpal a tei deuh.

Tial Thang nih a kha ah coih lio

Round 3 ahcun Tial Thang a tha dih i kan lo bak ko. A kut zong cawi kho huaha ti lo. Song Min Jong nih duhtawk in a ṭhuat peng, a khamh zong aa khamh kho huaha ti lo, a tha dih chiahru bak khi si.

Round 3 hi cu Tial Thang zoh a har taktak. A sung sual lai ti ka phan tuknak ah a kuaih bakin ka kuai peng i aircond tang kik lakah ka thlen zong chuak dih. Tial Thang a nipiah nih, “Dir sawh hlah! Thong law nohsoh, ṭhua law nohsoh….” tiin lengin a au hnawh len nain tha dih cang cun a kut hmanh cawi kho ti lo i Song Min Jong nih puantom thlaimi bang duh paoh in a thongh peng, i khamhnak tha zong a ngei lo.

A dih lai ah Song Min Jong nih a tengh i a hrawh dih dengmang. A hngawng in reh i Tial Thang cu ‘na sinpi maw?’ tiah dailuci nih atu le tu a lungfim/lo a hal peng. Sau deuh khatin um hna sehlaw Song Min Jong nih puaipiat (KO) bakin a tei lai. Vanṭhat ah a caan dih.

Minutes 5 in round 3, dihlak minutes 15 an i ṭhua.

Biakhiaktu minung 3 ning te bakin “Song Min Jong nih a tei” tiin an khiah dih.

Tial Thang nih, “Pakhatnak ah, ka duhmi tuah khawhnak aa ka petu Pathian cungah kaa lawm! Ka team le ka fans pawl cung zongah ka lawm. Tutan cu kan deuh hna ruangah ka lungṭha hrim lo. Ṭhawng deuh in ka ra ṭhan lai! A rauh hlan ah kan i tong ṭhan hna lai!!,” ati.

Sungh caan um phung asi, nain kan sunghnak a ruang kawl in i remh lawngah hmailei ah teinak hmuh khawh asi. Tial Thang a sunghnak aruang bik tiin ka ruahmi cu:

  1. Ṭuang ah mi a tengh tikah ṭhuat a thiam lo. Song Min Jong hi Ṭial Thang nih a tengh lengmang ko nain cei lakin a ṭhua kho bal lo. Song Min Jung nih cun voi 2 te a tengh i a thah deng peng. Ṭuang ah tengh tikah i ven ning le ṭhuat ning hi Tial Thang nih biatak tein a cawn hau — Tial Thang nih a tengh ahcun a mih kho huaha lo i Song Min Jong nih a tengh ahcun a thah deng.
  2. A tha dih fawi tuk. Tha saunak (cardio) biatak tein a tuah hau. A tha dih fawi tukmi hi a ‘testosterone’ a tlawm ruang zongah si kho. Sibawi sinah a testosterone level aa check hau. Round 2 tiang lawng kha si sehlaw cu Tial Thang nih mark 2 hrawng in a tei hnga, nain Round 3 ah a tha dih i a kut hmanh cawi khawh ti lo caah Song Min Jong nih mark a ruh dih i a tei behnak asi.
  3. Mi thongh le chuih ṭha deuh in a cinh hau. Voi tam ngai a thongh le chuih khawh ko nain an pin deuh lo. Hi cu a chanbau tuk cu si lo, a za pah ko nain pin deuh in a thongh khawh ahcun a mak tuk lai ti bia. Song Min Jong cu a mi chuih a pinh tuk pinah kehlei le vorhlei duhpaoh in aa thleng kho i a ralpa caah a har deuh ngai.

Acunglei langhtermi 1 le 2 tal ahhin Tial Thang a ṭhancho lo ahcun hiti ning cun Bantamweight ah World Campion si ding cu a har ngai, nain a ṭhangcho deuhte ko lai. Na ruahning comment ve…

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...

US le NATO nih Ukraine sinah ral tuknak vanlawng kuat an timh

US le NATO nih Ukraine sinah ral tuknak vanlawng kuat dingin khua an khan liopi asi.US Ramdang Vuanci...