Ti nih a fenhmi Chin pa an hmu rih lo

Ti nih a fenhmi Chin pa an hmu rih lo

Tiva ah a tla i a tlaumi Chin pa Nang Suan Kham cu khuami nih an kawl peng ko nain atu tiang an hmu rih lo.

Nang Suan Kham cu Tedim peng, Phunom khuami a si.

August 10 ahkhan Phunom khuami 11 cu an khua hmanmi electric mei laknak hmun thianh ah an kal. An tlun pah i tiva an tan lio ah tlang in a rak luangmi ti cu ruah lo piin a lian i Pa Hau Sian Tuang (kum 15) le pa Nang Suan Kham (kum 14) a fenh hna.

Hau Sian Tuang cu tiva pawng burbuk lakah a nung buin an hmuh tthan. Nain, Nang Suan Kham cu atu tiang an hmu rih lo.

“Minung pakhat cu kan hmuh cang nain pakhat cu kan kawl lio si. Atu tiang kan hmu rih lo. Tiva le a pawngkam zong kan kawl dih cang. Kawlnak hmun zong hi a um ti lo,” tiah khuabawi pa nih a chim.

Nang Suan Kham nulepa nih August 13 tiang tel cu kawl an duh i mah tiang cu kan kawl ko lai tiah khuabawi pa nih a chimchap.

August 11zinglei sml 6 hrawng ah Phunom khuami le Zung khuami 200 hrawng nih an kawl tthan nain Nang Suan Kham cu an hmu rih lo. _ Khonumthung

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.