15.1 C
Hakha
Monday, June 21, 2021
- Advertisement -

Ṭial Tharmi

Thiamsang: UNHCR Chin ralzaam policy nih amah phungphai lila a buar

UNHCR nih Chin ralzaam hlawt dingin bia a khiahmi hi amah phungphai lila a buar, tiah Asia Pacific ralzaam kong thiamsang pakhat nih a chim.

“UNHCR nih Chinmi caah ralzaam zohkhenhnak donghter ding a timi hi amah UNHCR lila nih a sermi donghternak phungphai he aa kalh,” tiah Themba Lewis, Asia Pacific Ralzaam Covo Bu (APRRN) secretary general nih a chim.

“An zaamtakmi ram ah ‘a hmunmi’ thlennak ‘suttung’ a um lawngah ralzaam zohkhenhnak cu donghter ding, tiin UNHCR phungphai ah aa ttial.

“Chin state le Myanmar ram cu a him lo tuk rih tiah kan ruah. A ngaingai chim ahcun, liamcia kum tlawmpal zoh tikah a zual lei tu a panh chinchin.

“Ralzaam zohkhenhnak donghter tikah ralzaam hna harnak fak tuk an ton khawh caah, UNHCR nih tahfung aa ngeih.

“Ralzaam zohkhenhnak donghter tik ahhin, an ram ah an him lai maw, hmasa buainak ruangah harnak an tong lai ti maw, tbk., tiang ruah chih dih a herh. Hlawt ruangah ralzaam pawl hi ‘thih dantatnak’ tiang an tong kho,” tiah a chimchap.

Lewis hi kum 20 leng ralzaam covo a aupi cangmi a si i hlawt a tong vemi ralzaam dang pawl he zong rian a ttuan tti balmi a si.

“Liamcia caan i ralzaam zohkhenhnak an rak donghter ahhin cun, kap 3; UNHCR, ralzaam an umnak ram le kuat an sinak ding ram kha lungtlinnak an ngei tawn.

“Nain, tutan i Chin ralzaam hlawt an timhmi hna kong ahcun, kap 3 lungtlinnak an ngei ti ka thei ruamlo.

“Kap 3 nih lungtlinnak an ngeihmi cathluan chungah, cutin khatin ralzaam zohkhenhnak kan donghter lai, mah nithla hlan ah an ram ah kan kuat dih hna lai ti le a kirmi ralzaam pawl cu him tein ka zohkhenh ko hna lai tiah an chuahkehnak ram nih biakamh a si tawn,” tiah a chim.

February 26 ah UNHCR nih “Chin ralzaam donghternak kong he pehtlai in Malaysia le Myanmar cozah kan pehtlaih veve cang hna” tiah The Star media sinah ca a kuat.

Nain, Malaysia cozah nih “UNHCR nih phungning tein Chin ralzaam hlawt an si lainak kong thawng a kan thanh rih lo,” a ti ve hoi. Zei khom si ah, UNHCR he lungtlinnak zeihmanh an ngei lo ti a fiang.

UNHCR nih cun “Chinmi caah ralzaam zohkhenhnak donghter dingin bia kan khiahmi hi kanmah UNHCR phungphai ning tein kan tuahmi a si ko, kan phungphai kan buar lo” a ti.

“Kum tlawmpal chung Chin state le Sagaing ramtthen ramkhel sining kan hlat dih hnu ah Chin ralzaam hlawt dingin bia kan khiah hi si” tiah UNHCR nih a ti.

Alliance of Chin Refugees (ACR) chairman Mung Khat nih, “UNHCR nih hlathlainak kan tuah an timi hi ka zum lo. UNHCR nih Chin state pumpi ah kherhlainak an tuah lo caah a phichuak ka zum lo,” tiah a chim.

“Chinmi he hlathlainak tuah tti usih law a phi kawl tti usih law ttha, kanmah kan i tel ve lo ahcun a hmunmi phi a chuak kho lai lo,” tiah a chimchap.

UNHCR nih “Malaysia um Chin ralzaam 100 ah 80 (80%) nih cun ralzaam zohkhenhnak kan herh ti lo tiin minsen an thut fawn cang” tiah a chim.

Mahka zawn hi a biapi tuk – Malaysia Chinmi nih UN card kan thlen tikah card sau deuh ngah usih tiin thim awk 1nk (2019 Dec 31 hnu cun UN zohkhenhnak ka herh ti lo) ti kan i thimmi kha UNHCR nih kanmah tuknak hriamnam ah a hman. Tu hnu an in thimter hna ahcun 2nk (UN zohkhenhnak ka herh rih, RSD interview phit ka duh) timi kha i thim dih ulaw a ttha.

Lewis nih “Malaysia um Chin ralzaam pawl hi sihni nih ruahnak an cheuh hna lo caah a si. India um Chinmi pawl cu ruahnak an cheuh hna caah 2nk an i thim dih ko,” a ti.

Malaysia NGO Tenaganita nih, “UNHCR hi a bia aa kalh dih. Chin ralzaam pawl bia kan hal hna tikah, 1nk i thim dingin UNHCR officer nih a kan hneek an ti dih. Anmah tein an i thimmi si lo, UNHCR nih hramhram in a thimtermi hna si,” a ti.

“Nihin tiangah, UN zohkhenhnak ka herh ti lo a timi Chin ralzaam pakhat hmanh kan hmu rih hna lo,” tiah a chimchap.

Chin ralzaam hlawtnak policy cu kan zohtthan cuahmah lio a si ko, a phichuak cu Chin ralzaam upa sinah thawng kan thanhte hna lai, tiah UNHCR Lutlai Thomas Albrecht nih March 1 ah Chin ralzaam upa, CHRO le Senator Dean Smith sinah a chim – ka hmet law relchap.

- Advertisement -

Ṭial Tharmi

Malaysia um refugee pawl cu ‘CanSino’ raikhamsi chunh an si lai

Malaysia um refugee pawl zong raikhamsi chunh an si ve ko lai. CanSino raikhamsi chunh an si lai, tiah Malaysia cozah nih a thanh. Malaysia...

Chin refugee an i telnak Malaysia movie nih Shanghai ah ‘movie ṭhabik laksawng’ a ngah

'Barbarian Invasion' timi Malaysia um Chin refugee 2 an i telnak movie nih China ram Shanghai ah movie ṭhabik laksawng Jury Grand Prix a...

Russia ah Min Aung Hlaing a phan

Myanmar uknak firtu ralkap bawizik Min Aung Hlaing cu humhimnak meeting kai dingin nizaan ah Russia khualipi Moscow a phan. February 1 ah uknak...
- Advertisement -

World Cup luhnak puai Myanmar goal bawhtu Pyae Lyan Aung cu Japan ah refugee a sok

Kum 2022 ah Qatar ram ah tuah ding FIFA World Cup ah i tel khawhnak puai round 2nk cu Japan ram ah an tuah....

Rev Dr Dennis Shu Maung: Ramthumnak phan Chinmi nih Kawlram um Chinmi chanh hna usih

Australia Chin khrihfabu funtomnak bu Chin Christian Council in Australia (CCCA) hruaitu Rev Dr Dennis Shu Maung nih, "Ramthumnak phan Chinmi hna hi atu...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -