Myanmar ram in badminton tuk thiam Thet Htar Thuzar cu Zeya & Associates company nih Olympic zuamnak ah lut kho dingin cawnnak ca le International Challenge vaa zuamnak i a dih dingmi caah US$10,000 a bawmh.
Bawmhnak peknak cu December 1, 2019 ah Junction Square chung um Zeya & Associates company zungkhan ah an tuah.
“Myanmar ram a cawisangtu a si ruangah kan bawmh hi a si. Atu cu $5,000 lawng kan pek rih. April thla dih, Olympic zuamnak a kal tikah a tangmi $5,000 cu kan pek tthan te lai. Atu $5,000 kan pekmi hi Olympic zuamnak ah lut kho dingin ramdang zuamnak ca hman awk ah kan pekmi a si,” tiah Zeya & Associates company chairman nih a chim.
“Atu bantuk in bawmhnak an ka pek tikah ramdang i badminton tuk vaa zuam ding hi a sinpi ngai. A caan acun ram hlat deuh ah i zuam ding a si ahcun kal/lo ding kaa ruat ta. Atu ahcun bawmtu tete an hung um cang i a hlannak in tam deuh ramdang ah kaa zuam kho cang.”
“April thla dih hlan ahkhin Olympic zuamnak ah i tel kho ding si/lo a fiang ding a si i mah hlan paoh cu zuamnak ah kaa zuam ko lai. A ka bawmtu pawl an lungrawhter lo dingin le zuamnak ah mark ttha ka hmuhnak hnga a tthabik in kaa zuam,” tiah Thet Htar Thuzar nih a chim.
Thet Htar Thuzar cu a ra laimi December 3, 2019 ahkhin Philippines SEAgames ah nu pakhat tete badminton tuk zuamnak ah i zuam ding a si. Hmai kum January chungah Malaysia, Indonesia le Thailand zongah badminton tuk aa zuam rih lai.
Thet Htar Thuzar cu atu lio ah UAB Bank, Get Ride company le Zeya & Associates company nih an bawmh. – 7Day Daily
