Thet Htar Thuzar cu semi-final ah Vietnam nu he an i tong lai

Thet Htar Thuzar cu semi-final ah Vietnam nu he an i tong lai

Myanmar badminton tuk thiam Thet Htar Thuzar cu atu hi Maldives International Challenge 2019 ah aa zuam lio a si i semi-final ah Vietnam nu Vu Thi Trang he an i tong lai.

Vawlei Cung Badminton Tuk Thiambik Rank ah 64nk a simi Vu Thi Trang le Thet Htar Thuzar cu Nigeria ram ah tuahmi puai ah an rak i tong bal cang i Vu Thi Trang nih a rak tei.

“Vietnam nu tei ding cu a fawi lo. Nain, Thet Htar Thuzar cu a thiam chin lengmang. Hi ti ning te a that ko ahcun a tei khawh ko lai. Teinak le sunghnak hi 50-50 a si,” tiah Thet Htar Thuzar a pa Tun Tun Zaw nih a chim.

Thet Htar Thuzar nih quarter-final ah Vawlei Cung Badminton Tuk Thiambik Rank ah 47nk simi Canada nu Brittney TAM cu (21-19,14-21,21-9) in a tei caah semi-final ah a kai hi a si.

Thet Htar Thuzar cu Maldives International Challenge telhin International Challenge aa zuam hi voi 4 a si cang. Iran, Vietnam le Nigeria ram pawl zong ah aa zuam bal i Iran ah 3nk laksawng a ngah bal.

2020 i Tokyo khuapi ah tuah dingmi Olympic zuamnak ah i tel kho dingin aa zuam cuahmah mi Thet Htar Thuzar cu sawmnak puai, International Challenge le Future Series telhin voi 78 aa zuam cang i voi 58 teinak a hmu, voi 20 a sung.

Thet Htar Thuzar cu atu hi Badminton World Federation ning ah World rankings 68 a si.

Thet Htar Thuzar cu a tu lio aa zuamnak Future Series le International Series pawl ah Grade 3, Level 2 lawng a si rih. Level 3 a si mi Challenge ah teinak a hmuh ahcun Olympic i tel khawhnak lam a um cang ti khawh a si.

Atu tiangah Myanmar ram aiawh in Olympic ah badminton tuk aa zuam khomi an um bal rih lo, Thet Htar Thuzar lawng hi ruahchanmi a si. – The Irrawaddy

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.