US cozah nih uknak firtu Myanmar ralkap company dang 2 dantat chap rih.
Ralkap cozah hi tangka ngei hlah sehlaw rianṭuan kho hlah sehlaw, mipi cozah sinah uknak pe seh ti ruahchannak in ralkap tangka luhnak company pawl US he sipuaizi tuah a phih thluahmah hna hi si.
Myanmar chuak thing ṭhaṭha le lung mansung pale vialte a tlai dihtu ralkap company 2;
- Myanmar Timber Enterprise le
- Myanmar Pearl Enterprise cu US cozah nih US he sipuaizi tuah a phih hna pinah, US ah an ngeihmi chawva vialte chuah khawh lo dingin a kharpiak dih hna.
US Ramdang Vuanci Pu Antony Blinken nih, “Myanmar ralkap nih February 1 ah mipi cozah uknak a chuh hnu in a rammi 650 leng a thah cang hna. Ngakchia zong tampi a thah hna. Rammi 3,200 leng a tlaih cang hna,” tiah a chim.
“Myanmar mipi nih democracy uknak ah kir an duhmi cu ralkap nih zei a relpiak hna lo.
“Myanmar ralkap nih mipi cungah a tuahser bantuk US nih a theipar kan zunter peng lai. A tangka luhnak hrampi kan phihpiak peng lai,” ati.
Europe ram 27 funtomnak bu EU zong nih naite ah Myanmar ralkap tangka luhnak hrampi a simi ralkap company 2;
- Myanmar Economic Corporation le
- Myanmar Economic Holdings Limited cu Europe ram 27 he sipuaizi tuah a phih hna pinah EU um an chawva vialte a kharpiak dih hna i EU ram 27 tlawn zong a phih hna. Chinmi Pu Maung Ha telh in ralkap cozah (SAC) chungtel minung 10 zong dantat hna.
Mah company 2 hi US le UK zong nih kan hnu thla ah dantat cangmi hna si. US hi EU nakin a khulrang deuh ngai.
