Thawngṭha: UNHCR Malaysia nih 2013 Catlap pawl tat-ṭan ṭu tikah ‘card’ a pek cang hna

- Advertisement -

Nai hrawng cu UNHCR Malaysia nih 2013 catlap tat-ṭan a ṭumi pawl card a pek hna, tiah thawngpang ṭha taktak kan theih.

Na zumh lo zongah na mawh lo. UNHCR nih “2013 catlap pawl tat-ṭan nan ṭu tikah card kan pek hna lai” tiin thawng a thanh lo caah kanmah zong kan theihka cu kan zum ve lo.

Cucaah holhlet le pengtlang upa tampi kan chawnh hna i “bia dik asi ko e” tiin an fehter. “2013 catlap a thimi tat-ṭan a ṭumi paoh cu card an pek dih ko cang hna,” an ti.

UNHCR catlap aa tlaihmi Malaysia um Chinmi 20,000 leng caah cun hi nak thawngpang ṭha a um ti lai lo.

Nain, tat-ṭan a dihmi lawnglawng card an pek hna. Na UN catlap tat-ṭan a dih rih lo ahcun zung na kal zongah card an in pe lai lo. ‘A thih tikah ra te’ an in ti ko lai.

Catlap tat-ṭan dih tiang hngah a hauhmi hi a poi taktak.

Catlap i tlaih cu kan him lo tuk. Rian sok zongah boss cheukhat nih an kan duh lo. Palik he kan i ton paoh ah kan chunglei in kan tha thir dih i thinlung zawtnak (mental illness) zong kan ngei te lai ti phan a um. Rianṭuannak ah palik le lahwahkah (immigration) he i ton lebang ahcun catlap cu kan dih ko.

Catlap aa tlaihmi paoh cu tat-ṭan a dih tiang hngahter loin zung ah kal in card in thlenpiak dih colh si sehlaw a ṭha tuk hnga. Card a kan pek hlan ah minung tampi harnak kan tong kho. Hihi UNHCR nih a kan ruahpiak hrimhrim a herh – kan hruaitu CRC, ACR, FRO, tbk zong nih UNHCR an chimhte lai ti kan zumh, UNHCR zong nih kan hruaitu hna hi a upat hna in an chimmi a zulh a herh.

Na UN catlap na thlau ahcun palik sakhan ah ṭhohkhansa la law mah cu UN zungah i put law card dawh te an in pek ko lai – UN catlap zong ngeih ti lo (thlau) bu in palik sakhan ka kal ahcun an ka tlaih lai ti phan awk a um lo. Holh na thiam lo ahcun a thiammi i zulhter hna law ṭhohkhansa an in ṭialpiak ko lai. An in tlai lai lo.

Card chuh cangmi pawl an pe ve hna maw?

Card chuh cangmi kong ruah ahhin cun kanmah zong kan lungrawk tuk. Atutiang cu card/catlap chuh cangmi pawl card an pek mi hna an um rih lo.

UN zung na va kal zongah an in pek lai ti kan zum lo.

Mithar pawl card an pek hna timi hi tah bia dik asi maw?

Asi lo! Mithar cu card an pe hna lo. Nain, nai hrawng cu UN zungah mithar a rami pawl zung chung an luhter ko hna.

Zung chungah an min le chuah nithla pawl an lak hna i an ṭinter hna. UN Card silole UN catlap cu an pe hna lo.

A biapi tukmi theihternak: UNHCR Zung nih cun, “Appointment pek lomi cu hohmanh zung ah ra hlah uh” tiin thawng a thanh.

Nain, appointment a ngah bak lomi mithar pawl zung an kal i an luhter ko hna. UNHCR hi theihthiam a har ngai. Khatlei in ruah ahcun ralzaam a zaangfah tuk hna caah a luhter mi hna zong asi kho men.

Mah thawngpang theih hnu ah appointment ngah loin a kalmi nan tam tuk ahcun hohmanh luhter loin an in ṭinter dih men hna lai.

Update: 2013 catlap aa tlaihmi naite ah UN card an pekmi pakhat phone kan chawnh. Hmanthlak kan tarmi hi card an pekmi cu asi.

2013 catlap tat-tan a tu i card an pekmi si

“Ka catlap a thih caah kan hnu zarh Nikhatni ahkhan UN zungah ka kal i card an ka pek,” tiah a chim.

“Keimah hi ka UN catlap a thihnak thla 3 hrawng asi cang. UN zung phone kan chawnh i appointment kan in pek te lai an ka ti nain an ka pe bal lo. Zarh tlawmpal a rauh hnu ah kan chawnh ṭhan hna i Nikhatni ah ra an ka ti caah ka va kal cu card bak an ka pek ko.

“Zung ka kal ni ahhin appointment pek lo buin a rami an um len. Appointment nan ngeih lo caah um rih uh an ti hna i a ngeimi kha zung chung an kan luhter.

“COVID ruangah zung chung ahhin minung tlawmte lawng an kan luhter. A lawn deuh hnu ah appointment ngei lomi pawl cu an luhter ve hna i appointment an pek hna i an ṭinter hna.

“Rohingya pa cu 2013 catlap tat-ṭan a dih nai lomi a ra i a dih tikah ra te tiin an ṭinter.

“Kei hi minung tampi card an rak chuh hna lio ahkhan RSD interview an ka tuah i chuh vemi ka si. Nawlnak ca ka ṭial i kum 1 a nungmi appointment catlap an ka pek. Zapi zaraan 2013 catlap an pekmi hna bantuk kha asi ve ko. Mah catlap cu a thi i atu card an ka pek hi si.

UN card chuh cangmi an pek ṭhan hna tiin nan ruah sual lo ding a biapi ngai — Anih hi UN card chuh thaimi asi lo: Zapi zaran UN card chuh lio ahkhan an rak chuh ve ko nain nawlnak ca a ṭial hnu ah kum 1 a nungmi appointment catlap an pek ṭhanmi asi. Midang bantukin chuh thaimi asi lo (midang cu nawlnak ca ṭial hnu zongah cohlan hlei loin chuh thai an tong).

“Card chuh hnu ah nawlnak ca a ṭial ve ko nain cohlan hlei loin chuh thaimi pawl kha tutan ahhin card an pe ve hna lai maw timi cu ka hngal ve bak lo. An pekmi hna ka thei rih lo. Kei tu cu chuh hnu ah nawlnak ca ka ṭial i catlap pek ṭhanmi ka si.

“Nikhatni ka kal cu interview tuah zong um ti lo, card an ka pek colh ko,” ati.

Nawlpatnak: The Chin Express nawl loin website ah copy/paste lo dingin kan in nawl hna. Midang nih thei ve hna seh ti nan duh ahcun FB ah share khawh asi.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...