14.7 C
Hakha
Wednesday, October 20, 2021
- Advertisement -

Ṭial Tharmi

Thawngṭha: President Biden nih $1,400 cio bawmh dingin min a thut cang

US President Joe Biden nih “COVID-19 ruangah hartongmi mipi le company pawl $1.9 trillion in bawmh hna ding” timi cu min a thut cang caah upadi asi cang.

Mah upadi chung ahcun “income tlawm American mipi vialte $1,400 cio bawmh hna ding” timi zong aa tel.

“Tu zarh dongh hrawng ahcun mi tampi cu an bank account ah bawmhnak tangka a lut thluahmah cang lai,” tiah President Zung (White House) biachimtu Pi Jen Psaki nih a chim.

“American mipi dihlak kuatnak ding ahcun a ra laimi zarh tlawmpal chung a rau lai (tu zarh dongh ah a ngah rih lomi lungsau in hngak rih uh),” ati.

Mah pinah, rian ngei lo bawmhnak zarh 1 $300 pekmi zong kha September 6 tiang pek nan si lai. Fa ngeimi cu tax tampi an in khirh rih te hna lai.

Zeizat dah ka ngah lai?

Kum 1 ah income $75,000 tang a hmumi single cu $1,400 tling tein na ngah lai. $150,000 a hmumi nuva cu $2,800 tling tein nan ngah lai. US um Chinmi zapi zaraan cu kan income tlawm caah kan ngah viar lai tinak si. $80,000 cung a hmumi single le $160,000 cung nuva cu fang 1 hmanh nan ngah lai lo. Mah kong cu mah hi hmet law ka ṭial ciami ah tling deuh in rel khawh si.

Na income cu hnu bik tax return na file lio ah na langhtermi “mah zat hi ngunkhuai pek haumi ka income si (AGI)” na timi kha an zoh lai.

Mah pinah, ngunkhuai (tax) a pemi na si ahcun na fale kum 17 tang zong $1,400 cio an ngah lai.

Cun, na cawmmi upa (kum 17 le cunglei minung) zong $1,400 cio an ngah lai. Tahchunnak ah, high school kai liomi le college a kai liomi, le pum tlamtlinglo (rianṭuan kho lomi) kum 17 cung zong $1,400 cio an ngah lai.

Cun, kum 6 in 17 kar fa a ngeimi pawl cu fa 1 caah kum 2021 tax nan pekmi chungin $3,000 khirh nan si te lai. Fa 3 nan ngeih cun $9,000 khirh nan si lai.

Kum 6 tang fa a ngeimi cu $3,600 khirh nan si lai. Kum 6 tang fa 2 a ngeimi cu $7,200 khirh nan si lai.

Acei in ka ṭialmi acung sapaih 2 hi cu tax pekmi chungin khirh ding si caah tlawmte aa dang deuh.

Voi dang tawn ning ahcun kum 2022 ah tax return na file tikah khirh ding khi asi, nain cozah nih ‘mah tiang hngah cu mipi an har tuk lai’ ati caah July silole August thla thokin thla fatin an in kuat peng hna lai.

Kum 6-17 fa 1 caah thla fatin $300 peng nan bank ah cozah/IRS nih a rawn lai. Kum 6 tang fa 1 caah cun $360 peng a rawn lai.

Hmai kum 2022 tax return file tik ahkhin an in kuat thlu lomi acheu hrawng tang rih lai i tax return file tikah na file chih te lai.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -