Myanmar UN Palai U Kyaw Moe Tun thah a timtu Myanmar rammi 2; Phyo Hein Htut, kum 28 le Ye Hein Zaw, kum 20 cu FBI nih an tlaih cang hna.
US FBI nih, “U Kyaw Moe Tun hramhram in a rian phuahter dingin hrem le aa phuah duh lo ahcun thah dingin mithat hlan a timtu Myanmar rammi 2 cu kan tlaih cang hna,” tiah nizaan ah an chim.
“Ramdang cozah palai a simi Myanmar UN Palai U Kyaw Moe Tun cu Myanmar rammi 2 nih American vawlei bakah fak piin hliam asiloah thah an timh,” tiah New York thlanglei district cozah sihni Audrey Strauss nih a chim ve.
“U Kyaw Moe Tun cu New York City khuahriang Westchester County ah Myanmar rammi 2 nih thah an timh ti kan theih cangka in FBI nih kan hlat colh i kan tlaih hna hi si,” tiah FBI caankarlak director bawmtu Jacqueline Maguire nih a chim ve.
“US upadi cu US ram chung ummi vialte caah asi. Myanmar rammi 2 nih hin kan upadi an buar caah a theipar an zun lai,” ati.
FBI nih a tlaihmi 2:
- Phyo Hein Htut, kum 28 le
- Ye Hein Zaw, kum 20 cu Westchester um rampumpi biaceihzung ah taza an cuai cang hna. A tambik kum 5 tiang thongthlak khawhnak upadi in an cuai hna.
Phyo Hein Htut nih, “Thailand ah ummi meithal zuartu pakhat nih online ah aa ka pehtlaih i U Kyaw Moe Tun hramhram in a rian phuahter dingin misual hlang hna law fak piin velhter hna law tangka kan pek lai aa ka ti,” tiah FBI sinah a chim.
“Mah hnu zongah aa phuah duh lo ahcun, misual kha thah ter hna aa ka ti. Mah hnu ah, U Kyaw Moe Tun a motor accident ton ter dingin Thailand um meithal zuarmi pa he cun hnatlaknak kan ngei,” ati.
Mah hnu ah Ye Hein Zaw nih Phyo Hein Htut cu a pehtlaih i July thla dongh lai ah tangka voi 2 a kuat. A dihlak kuatmi $4,000 asi.
“Na rian na lim hnu ah $1,000 kan in kuat chap lai an ka ti,” tiah Phyo Hein Htut nih FBI sinah a chim.
Ye Hein Zaw nih, “Meithal zuartu pawl aiawh in tangka a kua lengmangmi ka si caah Phyo Hein Htut sin zongah tangka ka kuat tak ko. Naite zongah meithal zuartu pawl nih an ka fial caah minung 2 zong US tlawnnak ka tuahpiak hna,” tiah FBI sinah a chim.
Myanmar UN mission zung ah zaanghleicawi in security a ṭuanmi pa nih, “Phyo Hein Htut nih U Kyaw Moe Tun hliam asiloah thah dingin mithat ka hlan hna lai aa ka ti,” tiin Nihnihni ahkhan FBI a chimh hna.
U Kyaw Moe Tun cu NLD acozah nih Myanmar UN Palai ah a thimmi si. Kawl Ralkap nih uknak a fir hnu ah Myanmar mipi lei ṭang in UN meeting ah, “NUG cozah hi UN le ramdang vialte nih cohlang ulaw Kawl Ralkap thlak dingin Myanmar mipi kan bawm uh…,” ati caah Kawl Ralkap nih “ram rawitu na si” tiin a rian phuah nain aa phuak duh lo. UN le US zong nih “U Kyaw Moe Tun hi Myanmar UN Palai dik asi. Kawl Ralkap nih na thlahmi hohmanh kan cohlang hna lo” an ti i an dirpi ve. Mah ruangah thah an timh hi si.
Kawl Ralkap nih February 1 ah mipi thimmi NLD cozah (mipi cozah) uknak a chuh thokin duhlonak langhtertu sualnak ngei lo mipi 900 leng a thah cang hna pinah US um UN palai zong thah a timh chap hi cu fihnung taktak asi.
