16.1 C
Hakha
Monday, September 27, 2021
- Advertisement -

Ṭial Tharmi

Thawngṭha: EU nih Myanmar ralkap cozah lutlai 10 le company 2 dantat

Europe ram 27 kawmhmi bu European Union (EU) nih “phungninglo Myanmar ralkap cozah SAC hruaitu minung 10 le ralkap company 2 dan kan tat hna” tiah April 19 ah a thanh.

“Phungninglo ralkap cozah nih mipi a thahnawn peng hna i an ram cu lungpang in tlakpi a timh cang. Mah ruang cun ralkap nih mipi cozah cawnbia seh ti kan duh caah ralkap harnak kan pek hi si,” tiah Germany Ramdang Vuanci Heiko Maas nih a ṭuan hawi EU palai pawl he meeting an tuah lio ah a chim.

“Ralkap cozah lutlai minung 10 pinah, ralkap tangka luhnak hrampi a simi company 2 zong dan kan tat hna,” ati.

EU nih dantatmi ralkap company 2 cu;

  1. Myanmar Economic Corporation (MEC) le
  2. Myanmar Economic Holdings Ltd (MEHL) an si. Mah company nih Europe ram 27 ah an ngeihmi chawva vialte hman khawh lo dingin an kharpiak dih hna pinah anmah he sipuazi tuah an phih. Mah company hruaitu pawl cu Europe ram 27 tlawn zong an phih hna.

Mah company 2 hi Myanmar ram chung sipuaizi pical vialte a tlai dihtu, ralkap tangka luhnak ngan taktak an si. Thil cawkzuar, zuu le beer, cakuak le mipi hmanmi thilri, tbk vialte tiangin Myanmar ram chung sipuaizi vialte an tlaih dih. Ralkap nih ram mipi thi dawpnak caah a hmanmi company an si, ti khawh asi.

EU nih dantatmi minung 10 cu uknak firtu ralkap cozah State Administrative Council (SAC) lutlai pawl an si. “Myanmar ram democracy hrawktu an si ruangah dan kan tat hna,” tiah EU nih a thanh.

Kan hnu thla zongah, ralkap bawizik Min Aung Hlaing le a changtu ralbawi 10 cu EU nih dan a tat cang hna. Tutan ah SAC lutlai minung 10 le company 2 dan a tat chap hna hi si.

Ralkap cozah rianṭuan kho hlah sehlaw a lungdong seh tiin ralkap tangka luhnak pawl cu nitlaklei ram ṭhawngṭha pawl nih biatak tein an ngiar.

US le UK zong nih MEC le MEHL cu dan an tat cang.

Ralkap cozah cu uknak a firnak thla 2 si cang nain atu hi rian a ṭuan kho lo, furpi caan lam cim ruangah Hakha lei lan kho loin aa tapmi mawṭaw bantuk asi.

Ralkap nih ‘dotu pawl ruangah asi’ ati i dotu pawl cu ruru hranghrang in minung fa lo bang a thah thluahmah hna i 738 a thah cang hna. 3,000 leng a tlaih hna. Adang 700 leng tlaih dingin a kawl hna. Tampi thah dingin thihdan a pek hna.

Hmanthlak: 2016 Daihnak Meeting tuah lio ah Hluttaw Sang hruaitu Pu Mahn Win Khaing Than pawngah Min Aung Hlaing a thut lio. U Mahn Win Khaing Than cu atu lio ralkap dotu cozah NUG Prime Minister asi.

- Advertisement -

- Advertisement -

Rel Bikmi

Subscribe to The Chin Express Youtube

The Chin Express nih interview kan tuahmi hna le video thar kan tarmi pawl zoh lengmang na duh ahcun kan Youtube channel ah Subscribe tuah ve.

- Advertisement -