Europe ram 27 i funtomnak bu European Union (EU) nih Myanmar ralkap company 2 dantat a timh, tiah Reuters media nih a thanh.
Kan hnu thla March 22 zongah, EU nih Myanmar ralkap sinah hriamnam zuar a khap pinah ralkap bawizik Min Aung Hlaing telh in ralbawi 11 cu EU ram 27 ah tlawn a phih hna i EU ah an ngeihmi chawva vialte a kharpiak dih. Ralkap bawi 11 dan a tat hna, kan ti lai cu.
Hmai zarh ah dantat a timh ralkap company 2 cu;
- Myanmar Economic Holdings Limited (MEHL) le
- Myanmar Economic Corporation (MEC) an si.
Mah company 2 hi Myanmar ralkap tangka luhnak ngan taktak an si. Myanmar ramchung sipuaizi tam taktak a tlaitu company an si. US le UK cozah nih cun kan hnu thla ahkhan dan an tat cang, mah hi hmet law rel khawh asi.
Mah pinah, February 1 uknak firnak he aa pehtlaimi minung 10 zong dantat an timh hna.
EU palai pahnih nih, “Myanmar ralkap company 2 le minung 10 cu dantat dingin EU chungtel ram 27 kan lungtling cang, hmai zarh ah zapi theih in thawng kan thanh te lai,” tiah Reuters media ah an chim.
Hmai zarh lawngah zapi theih in thawngthanh an timhmi si caah atu cu EU palai pawl nih thil sining tling tein an chim ngam rih lo.
EU nih cun Myanmar ralkap nih uknak a firmi zong a mawhchiat i mipi sinah uknak pe ṭhan hna, ati.
