Kawlram in Australia a tlawngmi, sianginn kaimi le rianṭuanmi vialte cu Myanmar ram a him hlan lo paoh Australia ah umnak nawl kan pek hna, tiah Australia cozah nih a thanh.
Australia ram ah chikhat umnak visa in sianginn a kaimi, a tlawngmi le rianṭuanmi Kawlrammi hi 3,400 leng an um. Chinmi zong a zaza an i tel. Mah pawl cu Kawlram a him hlan lo Australia cozah nih an visa tatṭan kan ṭu piak peng hna lai, ati.
“Visa tatṭan ṭu piak awk a ṭhami cu kan ṭu piak hna lai, a ṭha lomi cu visa thar kan pek hna lai,” tiah Australia cozah nih a thanh.
“Kawlrammi 3,400 leng cu upadi ning tein Australia ah an um khawhnak hnga, Australia Ramchung Vuanci Zung nih an visa hoih in ruahnak cheuhnak ca kan kuat hna lai,” ati.
Lahwahkah Vuanci Pu Alex Hawke nih, “Myanmar rammi pawl cu an ram kir awk ah a him hlan chung paoh Australia ah an um kho lai,” tiah a chim.
“Myanmar ralkap cu asi khawh chungin ruru hranghrang in mipi lehrulh i sum, aruang um loin na tlaihmi vialte thlah dih hna law biaruahnak tuah tiin Australia nih fak piin kan forhfial peng,” ati.
Mah pinah, Australia um Myanmar ralkap cozah chungkhat minung 22 cu ‘ralkap tangka fimtu an si kho men asiloah ralkap cozah nih tangka a kuat khawh men hna’ tiin Australia Ramchung Vuanci Zung nih a hlathlai hna.
