Australia Ramdang Vuanci Pi Marise Payne nih, “Hramhram in uknak a chuttu Myanmar ralkap cu bawmhnak kan phih chung,” tiah Zarhpini zaan ah a thanh.
“Myanmar ram ah ralkap nih hramhram in uknak a chuhmi le mah ruangah sandahpiahtu mipi a thah thluahmahmi hna kongah Australia kan lungrawk tuk hringhran.
“Mipi nih sandahpiah cu an nuhrin covo asi. An nuhrin covo an hman ruangah thahnawn cu kan cohlang hrimhrim lo.
“Australia le Myanmar ralkap ral tuknak a si lomi Mirang holh cawnnak tibantuk rikhiah in i bawmhnak kan ngei. Mah bawmhnak cu kan phih chung lai,” ati.
Australia Hluttaw Sang MP/Senator zong a simi Pi Marise Payne nih, “Australia nih Myanmar ram ṭhanchonak caah bawmhnak kan pekmi hna zong ‘hartong le sifak le Rohingya le tlangmi dang’ hna bawmhnak caah kan hman cang lai,” ati.
“Hartong bikmi le rianrang in bawmhnak a herhmi pawl usape in kan bawmh hna lai. An sin a phak khawhnak hna, atu bantukin Myanmar cozah sinah bawmhnak pek ti loin cozah he aa pehtlai lomi zatlang bu sin in kan bawmh cang hna lai,” ati.
Aung San Suu Kyi ruahnak petu Australia chawlehnak thiamsang Sean Turnell zong ralkap nih Suu Kyi an tlaih lio ah an tlaih ve.
“Professor Sean Turnell, Aung San Suu Kyi, President Win Myint le ningcang loin nan tlaihmi vialte a rannak in thlah hna uh,” tiah Ramdang Vuanci Pi Marise Payne nih a thanh chih.
Tuni zongah Myanmar ram Bagan khua ah ralkap nih sandahpiahtu mipi meithal in an kah hna i minung tam ngai meithal hma an tuar.
February 28 ah sandahpiahtu minung 18 an thah hna. March 3 ah minung 38 an thah rih hna. Mah hlan zongah minung 4 an thah hna.
Tuni Yangon le Mandalay sandahpiahtu mipi zong mitthli tlaknak gas in an kah hna, khairiat meithal kuan in an kah hna, electric laihnak fung in an laih hna pinah ralrin peknak meithal zong an puah hnawh hna.
