Myanmar uknak firtu Min Aung Hlaing cu tu thla ASEAN meṭing kaiter lo dingin nizaan ah bia an chah cang, tiah Reuters media nih a thanh.
Myanmar ram daihnak caah tiin liamcia thla 5 lio ah ASEAN nih bia kan rak chahmi 5 kha Min Aung Hlaing nih a zulh lo caah tu thla dongh lai ah tuah ding ASEAN meṭing kai hlah seh, tiin bia an chah hi si.
ASEAN hruaitu pawl cu April 24 ahkhan Indonesia khualipi Jakarta ah meeting an rak tuah i Min Aung Hlaing zong an rak kaiter ve. Mah lio ah Myanmar daihnak caah tuah dingin bia 5 an rak chahmi cu;
- Myanmar ram buainak hi a rannak in daihter hrimhrim ding le aho paoh nih asi khawh chungin buainak tuah i sum cio ding
- Buainak tel lo tein, mipi duhmi aphi kawl dingin ṭuanvo ngeitu phu vialte cabuai cung biaruahnak tuah ding
- Biaruahnak cu ASEAN Chairman aiawhtu le ASEAN Secretary-General nih an tlangtlak lai.
- ASEAN hartong bawmhnak zung AHA Center in ASEAN nih hartong mipi bawmhnak kan pek hna lai le
- Ṭuanvo ngeitu phu vialte ton dingin ASEAN palai le a phu nih Myanmar ram an tlawn lai, ti asi.
Min Aung Hlaing nih, “Mah 5 hi tuah dingin ka lungtling ko,” tiin ASEAN hruaitu pawl cu a rak tiam hna nain nihin tiangah pakhat hmanh a tuah lo pinah buainak/ral fak chinchin a tuah peng. ASEAN palai le a phu zong atutiang Myanmar ram tlawnnak nawl a pe hna lo.
Tu thla ni 26 in 28 tiang ASEAN meṭing an tuah lai. Min Aung Hlaing cu an kaiter lai lo. Min Aung Hlaing zaka ah ramkheltu a si lomi Myanmar rammi 1 tu an sawm kaiter lai.
Min Aung Hlaing nih a duh lo ahcun meeting tikah Myanmar ṭhutden kan lawnter lawlaw lai, tiah ASEAN hruaitu pawl nih an chim.
ASEAN nih atu bantukin bia an chahmi cu zapi theih in thawng a thanh rih lo, tuni ah ASEAN chairman Brunei ram nih cathanh a chuahte lai.
Thawngpangṭha tuk asi
ASEAN nih April 24 meeting ah Min Aung Hlaing an rak kaiter caah Myanmar mipi le nitlaklei ram tampi kan phunzai i ‘Myanmar mipi caah thilṭha tuah dingin’ ASEAN cu kan auhnawh cio.
Atu bantukin kaiter lo dingin an pheu cu Myanmar mipi caah thawngpang ṭha taktak asi. ASEAN phungphai ah “ram chung buainak kongah i thlak lo ding” timi aa tel caah ASEAN pawl nih Myanmar hi an rak ti ngam tuk lo nain UN le nitlaklei ram pawl nih an hnek tuk i tutan ah kar nganpi a kan hlan piak hi asi.
Indonesia Ramdang Vuanci Retno Marsudi nih, “Min Aung Hlaing nih ram daihnak caah kar a hlan lo chung paoh cu ASEAN meṭing kaiter lo ding tiin Indonesia nih biatung kan dirh i hitin ASEAN nih bia kan chah hi si,” tiah Indonesia nih Myanmar mipi caah thilṭha tuah aa zuammi kong a chim.
Nitlaklei ram pawl nih ASEAN an thangṭhat
US, Australia, Canada, South Korea, Britain (UK) le EU nih cathanh an chuahṭi i tutan ASEAN thil tuah cu an thangṭhat.
“Myanmar buainak hi raltuk in si loin cabuai cung biaruahnak tuin phisin a herh, cun a rannak in democracy ram ah kirter a herh,” an ti.
“ASEAN nih atu lio Myanmar buainak daihter dingin na zuammi hi fek tein kan in dirpi.
“Myanmar zong nih ASEAN he rianṭuanṭi law ASEAN palai Erywan Yusof hi Myanmar ah tlawnnak nawl pe,” an ti.
ASEAN palai Erywan Yusof nih, “Aung San Suu Kyi telh in ralkap zuamcawhtu vialte tonnak nawl ka pe uh,” tiin Myanmar ralkap a hal peng nain Suu Kyi tonnak nawl an pek lo caah Myanmar tlawn ai let.
Nain ralkap biachimtu Zaw Min Tun nih tu zarh thokka ahkhan, “Erywan Yusof cu kan ram tlawnnak nawl kan pek ko lai nain Suu Kyi cu a sualnak ruangah taza cuai liomi asi caah tonnak nawl kan pe lai lo,” tiah a rak chim.
Min Aung Hlaing cu a ṭah lawng chuak ko lai
Min Aung Hlaing nih uknak a fir cangka in, kanmah ralkap hi ramdang nih Myanmar cozah taktak ah kan cohlang hna seh tiah fak piin aa zuam peng.
Sinain pakhat hnu pakhat nih an pheu lengmang i a innpa ASEAN hmanh nih a pheu rih hi cu a ṭah lawng chuak ko lai.
- UN Bupi Meṭing kai kho loin an rak pheu (hmet law relchap)
- France Hluttaw Sang le Europe Ramkomh Hluttaw nih Min Aung Hlaing pheu in NUG cozah an cohlan
- Min Aung Hlaing a lungrawk tuk i “NUG cu ralhrang asi, kanmah hi kan bawm uh” tiin cathanh a chuah
- Atu ah ASEAN nih Min Aung Hlaing an pheu hoi
