Kuala Lumpur — Malaysia le India um Chin ralzaam pawl US kan kalnak ‘OPE/RSC pre-screening interview’ cu tu zarh Nikhatni thokin an khar cang.
An kharnak kong cu kan hnu zarh Nilini ah Malaysia UNHCR zung i RSC/DHS holhlet pawl sinah DHS officers manager Bryan nih thawng a thanh hna.
An kharnak aruang cu US President Donald Trump nih 2019 October in 2020 September tiangah ramkip in ralzaam 18,000 lawng lak dingin minsen a thut ruangah asi.
18,000 chungah Asia in 2,000 lawng lak ding an si. 2,000 timi hmanh hi case si loin milu 2,000 ti asi caah chungkhar 1 milu 4 in tuak ahcun Asia in chungkhar 500 lawng lak ding tinak asi.
Asia in minung 2,000 (chungkhar 500 hrawng) chung hmanh ahcun Malaysia in zeizat dah lak an si lai ti a fiang rih lo. Tlawm perak taktak an si lai.
Nain a fiangmi pakhat tu cu, atutiang ahhin Asia ram kenkip i UNHCR zung pawl le US Tanzung pawl ah DHS interview a phi cangmi ralzaam 2,000 leng an um.
DHS (Lahwahkah) interview a phi cangmi lawng hmanh hi 2020 chungah US a kal kho lo ding an tampi. DHS interview a phi rih lomi chinchin cu 2020 chungah US kalnak lam a um ti lo caah OPE/RSC interview zong an khar behnak hi asi.
Bryan nih, “pre-screening (OPE/RSC) interview cu Malaysia lawng si loin khuazei ram hmanh ah a um ti lo. DHS interview balte hi a um ti lai maw ti kan chim kho rih lo. Hmasa ah OPE interview a phi cangmi pawl tal hi cu DHS interview rak tuah rih ko hna uh tiin DHS zung ah kan hal cang nain a kan let rih lo,” tiah a chim.
2020 November 3 ah US President thimnak an tuah lai. Mah tikah Donald Trump a tlak ahcun Democratic nih president an tlaih lai caah thil sining aa thleng te kho men. Sinain, Donald Trump a kai rih ahcun ralzaam pawl caah a har chin lai.
Malaysia ah Chinmi 50,000 hrawng kan um rih. Kan fale zoh in hmailei khuasaknak kong ruah ahcun tha a chia ko.
