Thawngpang Chia: UNHCR Nih Chinmi Vialte A Kan Hlawt Dih Cang Lai

Thawngpang Chia: UNHCR Nih Chinmi Vialte A Kan Hlawt Dih Cang Lai

Malaysia – nizaan June 13 kha Chin Ralzaam Bu (CRC, ACR, FRO, tbk.) upa pawl cu UNHCR nih meeting a auh hna i ngaihchia taktak in a ttinter hna.

“Ramthumnak kal dingin interview a phi cang i lam tanttim a phan cangmi dah ti lo, adang Chinmi paoh cu UNHCR nih kan in hlawt cang hna lai,” tiah UNHCR nih a ti hna.

2018 August 1 thokin card/catlap nan thlen tikah thim awk 2 kan in pek hna lai. Thim awk 2 hna cu;

  1. Ralzaam Dirhmun Biakhiahnak (RSD) interview phit na duh maw? Na duh ahcun thla 2 chungah kan in phitter lai. Na awnlo ahcun card/catlap kan in pe ti lai lo ti lai lo, i mah ni bak cun UNHCR he zeihmanh pehtlaihnak na ngei ti lai lo. 99% cu na awn lo ding a fiang ko.
  2. RSD interview phit na duh lo ahcun 2019 December 31 ca tiang card kan in pek lai. Mah hnu pinlei cu catlap/card kan in pe ti lai lo. UNHCR minung na si ti lai lo,” ti a si.

2nk hi i thim hna usih law a ttha deuh. Chin miphun caah cun RSD interview awnnak lam a um lo tluk si.

Chinmi, ahlei in 2013 UN card ngah caah UNHCR ruahchannak a um ti lonak kong cu CRC rianttuan Tha Ceu Lian (acung hmanthlak) nih 2017 November thla i The Chin Express interview ah a rak chim bal cang.

2013 UNHCR card ngah lawng a si ti lo, Chinmi vialte hlawt kan si lai

Zeitik kum ah dah UNHCR card na ngah ti kha an zoh lo. Ramthumnak kal dingin interview a phi cangmi na si/lo lawnglawng an zoh. Meeting a kaimi upa pawl nih an chimnak ahcun, “OPE le Lahwahkah/DHS interview a phi cangmi paoh cu an luat lai,” ti a si.

Tu thla chungah UNHCR rianttuan pawl cu Chinmi umnak sang kip ah an ra lai i, “mizei dah an luat lai i mizei dah hlawt an si lai, zei ruangah..” ti pawl cu Chin mipi sinah fianternak an tuah lai. Mah tikah fiang deuh in kan theihte lai.

Chin miphun lawng hlawt kan si lai – Kachin, Rohingya le miphun dang pawl cu voi dang tawn bang an kal peng ko lai. Chin khualipi Hakha ah Malaysia UNHCR Lutlai Richard Towle a rak tlung, adang UN hlathlaitu le US Kawlram Palai pawl zong an va tlung.

Tikah, “Chin state hi a him tuk ko, CNF zong nih ralkap he i kah ti lo dingin minsen an thut cang caah an ram ah ral a um ti lo… Chin miphun cu an ram ah an kir kho cang” tiin UNHCR nih a kan cohlan ti lonak a si.

Malaysia Chin miphun lawng kan si lo – “Delhi le Thailand ah UNHCR card ngah Chin miphun vialte zong UNHCR nih a hlawt dih cang hna lai” tiah nizaan meeting ah UNHCR nih a chim. Nan case kha kan zoh ti lo, atu lio Chin state a him/lo lawnglawng kan zohmi si. “A him ko” caah Chinmi vialte ralzaam ah cohlan nan si ti lo, a ti.

Mah bia hi RSD interview a phi Chinmi pawl an hlawt hna tikah an chim lengmangmi a si.

Chinmi caah zeidah a tang? – 2019 chungah Australia na kal khawh lo ahcun Malaysia ah  UNHCR card/catlap lo, mah tein um asiloah Kawlram kir lawng a taang cang.

Chin Ralzaam Bu (CRC, ACR, FRO, tbk.) nih zei an ti? – June 13 lawngah mah thawngpang hi theih a si caah atutiang ahcun kan pale hna nih zeihmanh biakhiahmi an ngei kho rih lo. Nain, zei pipa ruahchan awk a um ti lo.

MyRC card tuah ta? – MyRC cu My Refugee Card tinak a si bang, UNHCR nih refugee ah cohlan lomi nih cun ngah a har lai. Nain, kan pale hna nih Malaysia Ramchung Vuanci Zung hna an nawl kho te hnga maw, hngak deuh rih hna usih.

Leave a Reply

Your email address will not be published. Required fields are marked *