Malaysia um Chinmi caah thawngpang chia ngai asi.
January 13 in 26 tiang lawng lockdown (MCO) tuah ding an timi state 6 le federal territories dihlak (3);
- Selangor state
- Penang state,
- Johor state,
- Sabah state,
- Melaka state,
- Kelantan state,
- Putrajaya (federal territory),
- Labuan (federal territory) le
- Kuala Lumpur (federal territory) cu February 4 tiang kan sauh, tiah cozah nih tuni ah a thanh.
Malaysia um Chinmi vialte kan umnak hmun an si. January 13 in lockdown an tuah cang caah Laimi tampi rian kan ṭuan kho lo i inn man, ti/mei man le rawl einak caah tangka kan ngei lo. February 4 tiang an sauh cu apoi chiahru.
Thaizing January 22 thokin state dang 6;
- Kedah
- Perak
- Negri Sembilan
- Pahang
- Terengganu le
- Perlis zong February 4 tiang lockdown (MCO) an tuah ve hna lai.
Cucaah, thaizing thokin Sarawak state ti dah lo Malaysia rampumpi lockdown (MCO) asi lai tinak asi.
Malaysia ah state 13 le federal territory 3 a um – theihtlei
Lockdown chung ahcun state dang le peng (district) dang kal a ngah lo. Ni fatin nunnak caah a herhmi rawldawr, supermarket, market, petrol station le sii dawr ti dah lo cu zei rian hmanh ṭuan a ngah lo. Company le zung dang vialte khar dih an si. Pumh, puai tuah, lentecelh le mibu um zong a ngah lo. Chungkhar pakhat in minung 2 lawng rawl cawk ah lengchuah khawh asi. Zapi zaraan cu inn chungah i erh dih asi.
Runvennak Vuanci Pu Ismail nih, “kan ram ah COVID-19 zawtnak a karh chin lengmang caah Ngandamnak Vuanci Zung nih ruahnak a kan cheuh ningin bia kan khiahmi asi,” ati.
“Liamcia ni 14, January 7 in nizaan January 20 tiang zawtnak a karh tuk caah asi.
“Mah ni 14 chung ahhin Kuala Lumpur ah mizaw 4,413 kan hmuh hna. Johor 5,665, Sabah 6,027, Putrajaya 294 le Kelantan 1,208 bak kan hmuh hna.
“Mah state i peng tampi cu ‘ṭihnung hmun (Red Zone)’ cazin ah kan chiah hna,” ati.
Runvennak Vuanci Pu Ismail nih Kuala Lumpur, Selangor, Penang, Johor, Melaka, Putrajaya, Labuan, Sabah le Kelantan pawl February tiang lockdown dingin thawng a thanh lio VIDEO cu atang ah zoh khawh asi.
