US um Chinmi caah thawngpang ṭha taktak asi. Myanmar ram um kan nulepa, kan nupi, kan fale le unau pawl US ah um thai dingin lak khawh an si cang.
Nizaan January 20 ah 46nak US President ṭuan dingin bia an kamter khawh cangka in, President Joe Biden nih president nawlngeihnak hmangin Trump khualtlawn khammi (Trump’s travel ban) a hnon colh.
President hlun Donald Trump nih Myanmar telh in ram 13 bak US tlawn le peem a kham hna caah Myanmar um kan nupi, kan fale, nulepa le unau lak khawh an si lo.
US in Myanmar (Laitlang) ah nupi a ṭhimi kan tampi. Cun, Kawlram um kan nulepa le unau laknak a tuahmi zong kan tampi.
Sinain, ramdangmi a hua tukmi ziachia Donald Trump nih Myanmar rammi paoh cu US peem a kham hna caah nihin tiang kan la kho hna lo.
Mah ruangah, US ah a chuak ding kan fale tampi zong Kawlram ah an chuak. Kan nupi le zong vale loin Kawlram ah harnak tampi tuar in fa an ngei. Trump nih kan nupi, fale, nulepa le unau a kham hna thawngin zei hmanh a miakmi um hlei lo, miphun dang huat le ziachiat tuk bia khi si ko.
Trump nih cutin ram 13 a khammi hna cu President Biden acozah nih “miphun dang serhsat asi” ati i a hnon colh hi si.
COVID-19 zawtnak a thian cun Myanmar um kan chungkhar cu ‘vingving’ tiin US an ra thluahmah cang lai. Tu kum le hmai kum cu US um Laimi tampi kan nupi, fale, nulepa le unau he US ah kan i tong hna lai i mi tampi lawmhnak in kan khat lai.
