Wednesday, December 1, 2021

Thawngṭha: US le UK nih Myanmar ralkap company tumtlang MEH le MEC dantat

Myanmar ralkap tangka hmuhnak hrampi a simi an company 2 cu US Tangka Vuanci Zung nih a phihkham (dantat) hna. UK cozah zong nih US bantukin dantat ve hna.

US cozah nih dantatmi Myanmar ralkap company 2 cu:

  1. Myanmar Economic Holdings Ltd. (MEH) le
  2. Myanmar Economic Corporation Ltd. (MEC) an si.

MEH le MEC nih US ram ah an ngeihmi chawva le thilri vialte cu US cozah nih a khar viar. US company he zong i pehtlaih an ngah ti lo.

Myanmar Economic Holdings (MEH) hi ralkap company mangtara taktak asi. Myawaddy Bank zong khi MEH nih a tlaihmi si. Kawlram chung sipuaizi pical vialte:

  1. Construction
  2. Leitang chuak (sui, lunghring, zinaan, gas, tbk) cawhnak
  3. Cinthlaknak le saṭhil zuatnak
  4. Cakuak le rawl sipuaizi tiangin a tlai dihtu si. Myanmar Beer hna khi MEH nih a tlaihmi ralkap ta asi.

MEH sipuaizi in a lutmi tangka vialte hi mipi nawngtu ralkap ca lawngte asi, tiah US Tangka Vuanci Zung nih a chim.

Myanmar Economic Corporation (MEC) hi pehtlaihnak a simi sim card le internet sipuaizi lei a tlaimi si. MPT le Mytel zong khi MEC he aa pehtlaimi an si. Ralkap caah mansung kokek chuak thil petu le ralkap hman ding thilri chuahnak sehzung pawl a tlaitu asi.

US Tangka Vuanci Zung nih MEH le MEC dan a tatmi hna kong cu, “Burma mipi nih democracy phungning tein an thimmi cozah uknak a chuttu le mipi nawngtu ralkap tangka luhnak hrampi kan reuter mi si,” tiah a thanh.

US, India, Australia le Japan hruaitu hna nih “Myanmar ram ah democracy kan lenter ṭhan lai” an ti. US nih “mipi thimmi sinah uknak pe ṭhan dingin Myanmar ralkap hi fial” tiah China zong a chimh.

- Advertisement -