Thantlang peng khuate tampi ah aa dormi ralzaam hna cu Thantlang Relief and Reconstruction Committee (TRRC) phu nih;
- Thilpuan hrukaih
- Blanket puan le
- Belkheng an kuat hna.
“Tutan kan phawtmi thilpuan hrukaih, puan lum le belkheng pawl hi motor 3 phur asi,” tiah Pu Ram Khar nih a chim.
“Zahnak tlang, Khualhring tlang, Bual peng, Vailam tlang le Vanzang tlang ah kan kuat hna.
“Motor 3 nih an phorh i tangka cun a tlawmbik ting 300 leng man asi.
“December thla thok ah avoi 1nk motor 3 phur kan kuat cang. Tutan hi avoi 2nk asi.
“Tutan ralzaam hna sin kan kuatmi thil pawl hi Korea in Pastor Phat Sung (Cung Bawi) le a hawile, Mandalay in Rev. Simon Thawng Hmung le Kawl lei in kan hawile dang hna le Hakha Red Cross hna nih ṭhenhmi asi.
“Petu hna dihlak cungkan i lawm tuk. A dang dang pumpak in petu hna cung zong ah kan i lawm tuk. Petu dihlak, Pathian nih a let tampi in thluachuah in pe ko hna seh,” ati.
