Wednesday, December 1, 2021

Thantlang peng CNF sakhan pawngah Kawl Ralkap vanlawng an zuang len cang

CNF zunglubik Camp Victoria sakhan pawngah nizaan October 12 zaanlei ahkhan Kawl Ralkap vanlawng an zuang len, tiah RFA nih a thanh.

Tuni zongah motor tam taktak in ralkap torlecheng Chin ram an lut thluahmah.

“Nizaan kha Thantlang pengah Kawl Ralkap nih cunglei in vanlawng in thil sining an hung ngiat. Tu zingka zongah ralkap tampi motor tampi in Falam in Hakha an phan tiah ka theih,” tiah min langhter a ngamh lomi khuami pakhat nih a chim.

Kawl Ralkap tam taktak cu motor 48 le tank 2 in nizaan kha Falam an hung phan.

Peng dangah an kal rih men lai tiah zumh asi caah CNDF nih, “Falam-Rih le Falam-Hakha kar ah hohmanh khualtlawng hlah uh,” tiin mipi ralrinpeknak thawng a thanh.

Kawl Ralkap nih September 23 thokin Hakha dah ti lo Chin ram pumpuluk internet a phih dih i Sagaing le Magway ramthen in motor le tank a zaza in ralkap a thong hrawng hung thlah cuahmah hna.

Tuni zongah Magway ramthen, Pakokku in Kawl Ralkap tam taktak motor 88 khat in Mindat an phan cang.

Tuni zongah Kyaukhtu khua in motor 90 le tank 2 khat in ralkap tam taktak Mindat khua lei ah an hung kai, tiah khuami nih an chim.

- Advertisement -