December 30, 2021 ah Myanmar ralkap nih Khrihfa biakinn le khrihfa zung 7 telh in Thantlang khua inn 55 an khangh ṭhan. Khrihfa biakinn le khrihfa zung 7 an khanghmi cu;
- AG Biakinn
- AG Quarter
- TBC Hall
- TBC Guest House
- TBC Nursing School
- TABC Office le
- TABC Nubu inn an si.
Biakinn Sang, TABC Sang, Lungtial Sang le Saihpizi Sang tiah sang 4 ah inn 55 an khangh hi si. Inn 55 ngeitu min cu atang hmanthlak ah zoh khawh an si.
December 18 inn 20 kar zong ahkhan Thantlang khua inn 65 an khangh.
Myanmar ralkap nih September 9 in Thantlang inn khangh an thok i atutiang ahhin inn 673 an khangh cang.
- Avoi 1nak September 9 ah inn 1
- Avoi 2nak September 18 = inn 19
- Avoi 3nak October 29 = inn 164
- Avoi 4nak November 6 = inn 8
- Avoi 5nak November 9 = inn 2
- Avoi 6nak November 10 = inn 7
- Avoi 7nak November 11 = inn 3
- Avoi 8nak November 24 = inn 49
- Avoi 9nak November 27 = inn 96
- Avoi 10nak December 4 = inn 20
- Avoi 11nak December 5 = inn 38
- Avoi 12nak December 8 = inn 23
- Avoi 13nak December 18-20 = inn 65
- Avoi 14nak December 30 = inn 55 tiin a dihlak inn 673 an khangh cang.
Thantlang khua cu inn 2,000 hrawng a um i minung 10,000 hrawng an umnak asi.
Thantlang khuami vialte cu September thla dongh lai ah India ramri lei ah an zaam dih caang cang hna. Cheukhat cu ramri khuate ah an i dor, cheukhat cu India ram, Mizoram state ah an zaam.
Tangka ting thong tampi dih in sakmi, Thantlang khua a dawhtertu zalampi tomi inn ṭhabik le dawr vialte cu Myanmar ralkap nih an khanghmi inn 673 chung lak ahhin an ciam dih cang.
Thantlang khuami thong tampi cu ral daih hnu ah kir duh hmanh hna sehlaw inn an ngeih ti lo pinah an thilri vialte zong a kangh dih cang caah an harsa tuk lai. Asi khawh ahcun ralzaam sok in ram thumnak hna phan kho hna sehlaw an caah a ṭha deuh ngai lai.
