Thailand ralkap nih Myanmar ram in a rak zaammi ralzaam pawl umnak caah Tak province ramri ah camps 23 a sak.
February 1, 2021 ah ralkap nih uknak a lak hnu in rammi cheukhat cu innpa ram simi India le Thailand ah a zaammi an um.
3nk Army Area command nih Myanmar ram in a hung zaammi pawl cu ramri ah an ngandamnak kan check hna lai. Minung 40,000 hrawng caah umnak (camp) kan timhtuah cang tiah tuni ah a thanh.
A hung zaammi pawl cu phun 3 in an tthen hna lai;
- Myanmar ah rianttuanmi Thailand rammi
- Myanmar rammi (rammi sawhsawh, palek/ralkap) le
- Ramdangmi, INGO le NGO rianttuan pawl le ramkhel ruangah a zaammi
Camp 23 an timh i minung 39,400 leng an i tlum lai.
Mae Sot district ah an sakmi camp 10 ah ralzaam 19,000 a tlum hna lai.
Phob Phra district ah sakmi camp 2 ah ralzaam 2,000 a tlum hna lai.
Mae Ramat district ah sakmi camp 2 ah ralzaam 6,000 a tlum hna lai.
Umphang district ah sakmi camp 5 ah ralzaam 4,200 a tlum hna lai. Cun, Tha Song Yang district ah sakmi camp 4 ah ralzaam 8,000 a tlum hna lai.
Ralkap bawi Santi Sakuntak nih, “Harnak an ton ruangah kan cohlan hna lai. Thil sining a tthat tikah kan khirh tthan te hna lai. Hika ah zungzal umter kan tim hna lo,” tiah a chim. – The Nation
