BANGKOK: Tu zarh chungah vok 200 leng kan thah, tiah Thailand cozah nih Nithumni ah a thanh. Africa vok zawtnak hrik a karh sual lai ti phan in a thah hna hi si.
Thailand ram ah vok zeizat dah ‘African vok zawtnak hrik’ an ngei ti balte cu a thanh lo. Vok thihnak tiang a chuahter khotu zawtnak cu Thailand innpa Myanmar, Laos le Cambodia ram hna zongah an hmuh.
Thailand Sathil Zuatnak Zung (cozah) nih, “Chiang Rai pengah ruah lo piin vok 2 an thih caah vok zawtnak a karh sual lai tiin kan thahmi hna si,” tiah a chim. Chiang Rai cu Myanmar he meng 12 hrawng lawng aa hlatmi si.
“Vok zuatnak lo 2 ah vok 200 leng kan thah hna,” tiah pengkulh sathil zuatnak zung lutlai Nopporn Mahakanta nih a chim. “Sathil zawtnak khamnak caah tuah a herhmi hrim si,” tiah a chim.
“Vok 200 leng kan thahmi hna hi vok 2 an zawt i an thihnak hmun in 1km lawng aa hlatnak hmun ah a ummi an si.
“Vok a thi le tissue cu Africa vok zawtnak hrik a um/lo check dingin Nikhatni ahkhan Lampang peng laboratory ah kan kuat.
“A result cu ni 14 hnu lawngah a chuak te lai,” tiah a chimchap.
Africa vok zawtnak cu Asia leitthen ahcun August thla ahkhan China ram ah an hmuh hmasa bik, China ram vok 40% hrawng an thi. Mah hnu cun Asia ram tampi ah a karh. Mongolia, Vietnam, Cambodia, Laos, Myanmar le Phillipines ram tiang ah a karh.
Tu zarh ah South Korea ram ah vok 2 zong cutin an zaw ve.
Mah thawngpang a than cangka in Thailand cu aa ralring colh. Myanmar le Laos ram in voksa luhpi lo ding, tiah nawl a chuah colh nain vanchiat an tong ve tthiam. — Reuters
