Ralkap nih vanlawng in KNU a kah ruangah khuami 3,000 leng cu Thailand ram lei ah an zaam nain ramri ah Thailand ralkap nih an kham hna i hramhram in an kirter hna.
Nain, Nikhatni ah Thailand cozah nih Myanmar ralzaam pawl cu hramhram in kan kirter hna lo tiin aa pheh. Kan ram runvennak upadi ningin ralkap nih ramri ah an kham hna bia a si a ti.
Zarhteni ahkhan Karen hriamtlai phu KNU nih Myanmar ralkap a kah i an sakhan 1 a chuh hna.
Suimilaam tlawmpal hnu ah ralkap nih vanlawng in bomb tampi an hung thlak i Karen mipi 3 an thi, adang 8 hliam an tuar.
Zarhpini ah ralkap nih vanlawng in bomb a thlak ṭhan caah Karen mipi 3,000 leng nih an inn an zaamtak i nunnak kawl in Thailand ramri ramtang ah an zaam.
Karen ralzaam pawl cu Thailand ralkap nih Myanmar ramri lei ah a ummi Ee Thu Hta camp lei ah an kirter hna.
Karen khuami pakhat nih video a thlak pah in “Zoh hmanh uh, Thailand ralkap pawl nih kir dih uh an kan ti. Zoh uh, tar pawl zong kir an hau. Zoh ko uh, Thailand ralkap an tam ning cu,” tiah a chim. Video cu Reuters nih a tar.
Mae Hong Son province cozah lutlai Thichai Jindaluang nih, “Ralzaam pawl cu hramhram in kan kirter hna lo. Ramri ah a ummi Mae Sariang le Sop Moei district ah him tein an um ko,” tiin media sinah a chim.
Tuan ahkhan Thailand Ramdang Vuanci Zung in biachimtu Tanee Sangrat nih, “Thailand ram lei ah a rak zaammi pawl cu a herh ning hoih in cozah nih a si khawh chungin kan zohkhenh ko hna lai,” tiah a chim.
Nain, Mae Sariang District cozah lutlai Sangkhom Khadchiangsaen nih cun a rak zaammi pawl kan ram runvennak upadi ning in kham ding an si a ti.
“Hi bantuk a tawlreltu ding cu ralkap hi ttuanvo ngeimi an si i, UNHCR, NGO le INGO pawl zong luhter hna bak lo ding a si. Zeiti hmanh in kan onh lo,” tiah a chim.
NGO cheukhat nih nih, “Thailand nih zawnruahnak thinlung a ngeih lomi le a thil tuahmi hi atu tein ngol seh,” an ti.
Thailand Prime Minister Prayuth Chan-ocha nih hmasa ahkhan Myanmar ralkap tha kan pe hna lo i Myanmar ram in a rak zaammi pawl cu cohlan kan timh ko hna tiah a chim.
