Thailand ah siangngakchia phormi motor aa let i minung 13 an thi

Thailand ah siangngakchia phormi motor aa let i minung 13 an thi

Thailand ram, Bangkok khuapi ah tuni ahkhan motor pakhat cu lam kuih a timh lio ah aa let i minung 13 an thi. A tam deuh cu siangngakchia an si.

Motor aa leh lio ahcun a hnu lei ah a tthumi minung pawl cu lam cung ah an i hlonh hna.

“A hmun ah minung 12 an thi, a dang pakhat cu sizung ah a thi. A thimi chung ah minung 9 cu company ah rianttuan dingin seh thilri cawnnak aa limka siangngakchia an si hna ,” tiah palek bawi Samran Chaytao nih a chim.

Motor chung ahhin minung 18 an i cit. Siangngakchia le company rianttuan pawl cu sehthilri cawnnak an lim lawmhnak puai an tuah hnu leng an chuah ah atu bantuk in thil an ton hi a si.

A nungmi 5 lakah 2 cu an hma fak tuk.

Thailand ram cu vawlei cung ah lam accident in thih a tambiknak ram pakhat a si ve. Zuurit buin motor mongh le rang tuk in mongh ruangah accident a chuak bik.

Ni kum March thla ahkhan Thailand nichuahchaklei ah holiday in a kirmi bus pakhat cu thingkung aa pah i minung 18 an thi, mi tampi hliamhma an rak tuar.

Vawlei Ngandamnak Bu (WHO) nih naite ah report a chuah i Thailand ram ahcun minung 100,000 ah 33 hi lam accident in an thi peng a ti. US ahcun minung 100,000 ah 12 lawng an thi. – CNA

Azi cu Faiceu Journal website ah kum 1 leng thawnggpang a leh hnu ah The Chin Express (theihtlei.com, thechinexpress.com le thechinexpress.info) ah kum 3 chung thawngpang 2,000 leng a let/ṭial cang.