Thailand ah firmi Myanmar rammi 73 cu Thailand nih Myanmar cozah sinah a ap hna

Thailand ah firmi Myanmar rammi 73 cu Thailand nih Myanmar cozah sinah a ap hna
Karen state, Myawaddy khua nitlak lai

Thailand ram ah fir i phungninglo in rian ṭuantermi Myanmar rammi 73 hna cu Nikhatni ahkhan Thailand cozah nih Myanmar cozah sinah a ap hna.

Myanmar rammi 73 hna cu, phungninglo in Thailand ram ah rian an rak ṭuanter hna i tu kum thokka ahkhan Thailand cozah nih a khamh hna.

Nikhatni ahkhan Thailand ram, Mae Sot peng pawngah a ummi Myanmar ram, Myawaddy khua ah Myanmar rammi 73 apnak puai cu an tuah.

Apnak puai an tuah lio ah Thailand lahwahkah bawi Pol. Maj. Gen. Surachate Hakparn  nih, Myanmar rammi 73 cu Thailand tangka 145,000 (Kawlram tangka ting 70) a pek hna.

“Minung fir cu Thailand nih kan doh peng lai i phungning tein rian a ṭuanmi lawng kan cohlan hna lai,” tiah Thailand lahwahkah bawi nih a chim.

Atu lio ahhin Thailand ram khuazakip ah Myanmar rammi ting 20 (2 million) hrawng rian an ṭuan. Tampi cu misual nih fir in zuar an tonnak hnga lo phungnin tein rianṭuannak an i tuah cang hna.

Myanmar rammi tam deuh cu nga-tlaih rian an ṭuan.