Chin state, Tedim peng, Gawsing khuate ah Chin National Front (CNF/A) le Zomi Revolutionary Army (ZRA) an i kah caah khuami 2 hliam an ton pinah khuami vialte an zaam dih, tiin VOA media nih a ṭial.
“December 17 dei hlan 3am in 10am tiang meithal thawng kan theih. Kap 2 hriamtlai phu lei hliam tongmi an um/lo cu fehter khawh asi rih lo. Ral ruangah Gawsing khuami 2 hliam an tong.
“Atu hi Gawsing khua chung ahcun minung pakhat hmanh an um ti lo. An dihlak in an zaam dih cang,” tiin Tedim peng minung pakhat nih VOA sinah a chim.
Nizaan tiang ahcun, “Aa kapmi hi CNF si loin PDF Zoland le ZRA an si, nain ZRA ṭanhtu Tedim pawl nih NUG cozah le PDF he i ral le minchiat an duh lo caah CNF an puhmi asi,” tiin The Chin Express nih thawngpang kan theih.
Tuni ah, “VOA ṭialmi hi a dikmi si maw?” tiin CNF sinah cakuat in thawngpang kan kal hna nain atu mah ca kan ṭial lio tiangah a kan let rih lo.
Kawi Thawng nih cun, “CNF le ZRA hi atu bantukin aa ral balmi an si lo. CNF nih Tedim pengah Myanmar ralkap a kah hna tikah ZRA nih phun dangin an ruah. Atu hi Tedim pengah ZRA cawlcangh phun in a um. Tedim peng i ralkap uknak dotu PDF Zoland sakhan zong ZRA nih voi 3 lole 4 hrawng a hrawhpiak cang hna.
“Mah ruangah Chin Dothlennak Phu Komh (CJDC) nih ZRA kan in kahdoh lai ti tiangin fak piin cathanh an chuah. Mah hnu cu an karlak ah i theihthiam lonak a linsa chin,” tiah VOA sinah a chim ve.
December 5 ah ZRA nih PDF Zoland hruaitu Pu Cin Sian Sum an tlaih i khua lengah an kalpi hnu ah chiakha tukin an hrem thah. Mah ruangah CNF telh in CJDC nih December 11 ah fak piin ZRA duhlonak cathanh an chuah.
Mah thawngpang kong he pehtlai in VOA nih ZRA le CNF zong an pehtlai hna nain an pehtlai kho ve hna lo — CNF hi a caan ahcun pehtlaih an har ngai i an konglam thawngpang dik ṭial a har ngai.
ZRA cu kum 1997 ah an dirh i India ram, Manipur state ah hrambunhmi asi.
Chin National Front/Army cu kum 1988 March 20 ah an dirh i Myanmar ram, Chin state ah hrambunhmi asi.
