Tedim peng, Tonzang khuate um Basic Education High School (branch) sianginn a kangh ruangah siangngakchia pawl cu biakinn ah sianginn an kai i sianginn hman ding thilri le cattialnak khung an herh tiah sianginn uk saya nih a chim.
Basic Education High School (branch) sianginn cu October 11 zaan ahkhan mei a kaang i sianginn pakhat, saya/ma umnak inn 5 le minung umnak inn 1 a kaang.
Thadingyut sianginn khar dih sianginn hon caan ah siangngakchia pawl cu cacawnnak hmun an ngeih ti lo caah biakinn le Primary sianginn ah an tthen hna i cutin sianginn an kai chung.
“Biakinn i bochan in sianginn cu kan kai ko. Biakinn 3 le Primary sianginn (1) ah an kai hna. Zungkhan hman ding thilri le cattialnak khung biapi in kan herh,” tiah sianginn uk saya pa nih a chim.
Chin state Fimcawnnak Zung nih a kaangmi Basic Education High School (branch) sianginn caah ti chiahnak, hrai, puan, chantling, khiangthawng le ihphah a khanpiak hna.
“A kaangmi cozah sianginn Basic Education High School (branch) caah saya/ma umnak inn 3 cu a rauh hlan ah kan sakpiak hna lai. A kangmi tthutden ai ah ttuden thar 100 kan tuahpiak hna lai,” tiah Chin state Zatlang Zohkhenhnak Vuanci Pau Lun Min Thang nih a chim.
Tedim khua in meng 18 a hlatnak Tonzang khuate um Basic Education High School (branch) sianginn ahhin siangngakchia 420 an um tiah theih a si. – Khonumthung
