Tang lam in Malaysia a ra Kawlrammi 16 cu Thailand in Malaysia an luh bakah Malaysia palik nih an tlaih hna. January thla chung zongah 80 leng an tlaih cang hna.
Thailand he aa rimi Malaysia ram, Kalantan state i Pasir Mas peng, Kampung Batu khuate ah an tlaih hna hi si.
Kawlrammi 16 cu thil phorhnak motor lorry in an kal lio ah palik nih an tlaih hna, tiah Malaysia media NST nih February 1 ah a thanh.
Phungninglo Myanmar rammi 16 a phortu Malaysia rammi 2 zong an tlaih chih hna.
Ramri khuate Kampung Batu tan in an kal lio zaanlei mui lai 6pm ah an tlaih hna.
Palik nih lorry cu lunghrinh in an dirter check i ramdangmi 16 an hmuh hna. Nu 2 an i tel.
Malaysia tlawnnak visa pakhat hmanh an ngei lo. Lorry mongtu le sapial zong an tlaih colh hna.
Kawlrammi 16 cu kum 20 inn 30 har an si. Thailand ramri in phungninglo in a thlithup in an hung lut, tiah palik nih an chim.
“Lorry mongtu le sapial cu phungninglo ramdangmi pawl Kuala Lumpur lei ah va thlah dingin puaisa nih an fialmi chinmi hna an si.
“Ramdangmi he kan rammi he upadi an buarmi theipar zunter an si lai,” tiah palik nih an chimchap.
Malaysia um Chinmi cu phungninglo (tang lam) in a rami deuh lawngte kan si. Tam deuh cu him tein kan phan ko nain atu bantukin cheukhat cu tlaih an tong pah ve lengmang.
Tlaihmi pawl cu Lahwahkah Upadi in caan saupi harsa taktak in thong an thlak hna hnu ah Kawlram ah an khirh tawn hna. Hlan lio ahcun tlaih ton zongah thonginn ah UNHCR nih an ton hna i UNHCR card an pek hna i an chuah tawn hna nain atu cu ngah ti lo.
Tu lio cu Kawlram buai ruangah Malaysia rat a duhmi an tamtuk. Nain, Thailand le Malaysia nih ramri ah palik le ramri hngak ralkap tampi an ciah hna caah luh a har ngai.
Mah 2 ruang ahhin puaisa nih Malaysia rat man let 3 leng an lak. Voi dangah RM1,500 lawng an lak tawnmi kha atu lio cu RM6,000 leng lawngte an lak.
